Ístak Fréttir

Vinna við Fossvogsbrú hafin

Fri, 08 May 2026 14:21:39 GMT

Ístak og Aarsleff hafa hafið mikilvægan verkþátt við byggingu Fossvogsbrúar þar sem staurar í undirstöðum brúarinnar eru reknir niður í klöpp. Um er að ræða umfangsmikla vinnu á landi og sjó sem leggur grunninn að burðarvirki brúarinnar og markar tímamót í framkvæmdinni.

Verkið felst í niðurrekstri staura sem tryggja stöðugleika og burðargetu brúarinnar en aðstæður í framkvæmdinni gera miklar kröfur til nákvæmni og gæða. Undirbúningsvinna hefur staðið yfir um nokkurt skeið og með þessum áfanga farið að sjá áþreifanlega móta fyrir mannvirkinu.

Framkvæmdir ganga vel og vinna við undirstöður mun halda áfram á næstu vikum samhliða öðrum verkþáttum verkefnisins.

Sjálfbærniskýrsla Ístaks

Mon, 04 May 2026 15:06:17 GMT

Ístak hefur nú gefið út sína fyrstu sjálfbærniskýrslu fyrir starfsemi sína á rekstrarárinu 2024/25. Sjálfbærniskýrslugerðin verður eftirleiðis árleg útgáfa sem ætlað er að styðja við sjálfbærnimarkmið félagsins og vonir þess um frekari árangur á því sviði.

Sjálfbærniskýrslan inniheldur upplýsingar um umhverfisþætti, félagslegaþætti og stjórnarhætti auk upplýsinga er varða EU taxonomy vegna reksturs félagsins, ásamt því að greina frá helstu markmiðum þess um frekari árangur á sviði þeirra þátta.

Sjá skýrslu hér .

Skrifað undir samning við NLSH

Fri, 17 Apr 2026 13:01:13 GMT

Þann 31. mars var undirritaður samningur milli Nýs Landspítala ohf. (NLSH) og Ístaks um innanhússfrágang og stýriverktöku í meðferðarkjarna Landspítalans, frá kjallara K2 upp á 4. hæð. Samningurinn nær jafnframt til heildarstjórnunar og samhæfingar framkvæmda á umræddum hæðum.

Um er að ræða einn umfangsmesta samning sem gerður hefur verið vegna framkvæmda á Hringbrautarsvæðinu til þessa, en heildarverðmæti hans nemur 15,9 milljörðum króna með virðisaukaskatti.

Ístak hefur áður komið að uppbyggingu meðferðarkjarnans og sá meðal annars um allan þakfrágang byggingarinnar.

Auk þess er fyrirtækið nú að ljúka við byggingu 4.500 fermetra endurhæfingarspítala á Grensási, samkvæmt samningi sem gerður var við NLSH árið 2024.

Samningurinn var undirritaður af Ölmu D. Möller, heilbrigðisráðherra, og Gísla H. Guðmundssyni, framkvæmdastjóra byggingasviðs Ístaks. Vottar fyrir hönd NLSH voru Árni Kristjánsson, staðarverkfræðingur, og Helgi Davíð Ingason, sviðsstjóri hönnunarsviðs.

Ístak hélt BIM dag Ístaks í annað sinn

Thu, 05 Mar 2026 14:29:04 GMT

Ístak hélt BIM dag Ístaks í annað sinn fimmtudaginn 5. mars. Viðburðurinn fór fram í Háteigi á Grand Hótel og var afar vel sóttur en um 120 manns mættu til að fylgjast með dagskránni.

Markmið BIM dagsins er að miðla þekkingu og deila reynslu af notkun BIM og annarra stafrænna lausna í verkefnum innan Ístaks og víðar innan Per Aarsleff samstæðunnar.

Fulltrúar frá systurfélögum okkar, Per Aarsleff og Wicotec Kirkebjerg , héldu erindi um sína reynslu af stafrænum lausnum í framkvæmdum. Þá kynnti BIM-deild Ístaks einnig ný verkfæri sem eru að koma til notkunar, meðal annars áhættumatstól og VerkAI.

Viðburðurinn fór fram úr okkar væntingum og við þökkum öllum fyrir frábæra þátttöku��

Nýtt hjúkrunarheimili í Boðaþingi vígt

Mon, 23 Feb 2026 13:18:19 GMT

Í gær fór fram formleg vígsla nýs hjúkrunarheimilis Hrafnistu að Boðaþingi í Kópavogi, vígsluathöfnin var hin glæsilegasta og margt var um manninn.

Með nýrri byggingu bætast við 64 hjúkrunarrými og eru þau nú 108 talsins á staðnum. Byggingin er um 4.300 m² að stærð og hófust framkvæmdir í apríl 2023. Ístak var alverktaki, og verkkaupar voru Framkvæmdasýsla ríkisins (FSRE) og Kópavogsbær.

Ístak er stolt af því að hafa staðið að byggingu þessa nútímalega og vandaða heimilis sem mun bæta þjónustu við eldri borgara á höfuðborgarsvæðinu til framtíðar.

Við óskum ríkinu, Kópavogsbæ, Hrafnistu og að sjálfsögðu heimilsfólki og starfsfólki til hamingju með nýtt og fallegt hjúkrunarheimili og þökkum fyrir ánægjulegt og farsælt samstarf.

LiuGong - 100% rafdrifin vinnuvél til Ístaks

Mon, 19 Jan 2026 14:20:00 GMT

Ístak hefur tekið í notkun fyrstu 100% rafdrifnu stóru vinnuvélina sína og líklega stærstu rafknúnu vinnuvél sem er í notkun á Íslandi í dag.

Um er að ræða LiuGong 870 HE hjólaskóflu, sem mun sinna ámokstri í Stapafellsnámu og leysa af hólmi eldri dísilknúna Volvo hjólaskóflu.

Með þessari breytingu má gera ráð fyrir allt að 34.000 lítra eldsneytissparnaði á ári, sem er stórt skref í átt að minni kolefnisspori.

Helstu upplýsingar um vélina:

Þyngd: ~27 tonn
Skóflustærð: 5,7 m³
Rafhlaða: 423 kWh (LFP)
Hleðsluhraði: 300 kW
Ending rafhlöðu: 6–8 klst

Með innleiðingu rafknúinna vinnuvéla styrkir Ístak vegferð sína í átt að ábyrgum, umhverfisvænum og sjálfbærum rekstri.

Jólakveðja frá Ístak

Mon, 22 Dec 2025 11:34:00 GMT

Við óskum ykkur gleðilegra jóla og farsældar á komandi ári - Þökkum öllum okkar samstarfsaðilum og starfsfólki fyrir árið sem er að líða.

Samningur við Veitur

Mon, 22 Dec 2025 11:00:00 GMT

Ístak er eitt þeirra þriggja verktakafyrirtækja sem hafa gert rammasamning við Veitur, ásamt ÍAV og Stéttarfélaginu. Samningurinn var undirritaður 18. desember og byggir á útboði sem hófst í nóvember 2024 um viðhald og þjónustu á veitukerfum.

Útboðið fól í sér nýjar áherslur þar sem lögð var aukin áhersla á heildarlausnir til að auka hagkvæmni, skilvirkni og fyrirsjáanleika, auk þess að bæta þjónustu og gæði til viðskiptavina Veitna. Um er að ræða fyrsta rammasamningsútboð Veitna af þessu umfangi, þar sem viðhald lagna, heimlagnir og nýframkvæmdir eru sameinuð undir einum samningi. Samningurinn tekur til allt að 7,5 ára og inniheldur um 3.600 tilboðsliði.

Karl Andreassen, forstjóri Ístaks, segir að samningurinn endurspegli mikilvægan áfanga í samstarfi fyrirtækisins við Veitur:

„Ístak hefur ávallt lagt áherslu á faglega nálgun við úrlausn verkefna. Kröfur Veitna í rammasamningsútboðinu voru metnaðarfullar hvað snýr að gæðum, öryggismálum, umhverfismálum og faglegri hæfni. Það eru kröfur sem falla vel að stefnu Ístaks og því sérstakt gleðiefni fyrir fyrirtækið að vera eitt þeirra þriggja verktakafyrirtækja sem eru aðilar að samningnum. Við höfum átt í löngu og farsælu samstarfi við Veitur og fyrirrennara þeirra og mun aðild að rammasamningnum treysta það samstarf enn frekar í sessi.“

Ístak fagnar 55 ára afmæli

Thu, 04 Dec 2025 14:18:00 GMT

Ístak fagnaði 55 ára afmæli sínu í Hörpu 20. nóvember síðastliðinn og erum við virkilega glöð með hversu vel kvöldið tókst.

Við frumsýndum tvær nýjar heimildamyndir sem sýna vinnu og verkefni síðustu fimm ára, annars vegar um Varnargarðana og Svartsengi og hins vegar fá Hótel Saga og Edda - hús íslenskra fræða að vera í aðalhlutverki.

Við tókum á móti fjölda gesta sem gerðu kvöldið eftirminnilegt.

Við erum afar þakklát fyrir frábæra mætingu, hlý orð og samstarfið í gegnum árin. Takk fyrir að fagna með okkur!

Hér hafið þið hlekk á heimildamyndirnar - Heimildamyndir

Fossvogsbrú

Mon, 24 Nov 2025 14:07:00 GMT

Við hjá Ístaki erum stolt af því að ganga til samninga við Betri Samgöngur, ásamt systurfélagi Ístaks Per Aarsleff A/S, um eitt af stærstu og glæsilegustu samgöngumannvirkjum næstu ára á Höfuðborgarsvæðinu, byggingu Fossvogsbrúar sem mun tengja Kópavog um Kársnes við Reykjavík Vestan Nauthólsvíkur.

Þetta 270 metra langa brúarmannvirki verður mikilvægur liður í uppbyggingu Borgarlínu, þar sem markmiðið er að bæta samskipti milli hverfa, stytta ferðatíma og styrkja sjálfbærar samgöngur. Auk akreina fyrir Borgarlínu og forgangsumferðar, verður aðskilin hjólabraut og göngubraut á brúnni.

Verkfræðileg heildarlausn – sameiginlegur styrkur Aarsleff og Ístaks

Til að tryggja nákvæmni og gæði verður stálvirki brúarinnar reist í heild sinni á bráðabirgðaundirstöðum á vegum framleiðanda í Pólandi áður en stálvirkið verður flutt með skipi á endanlegan stað og híft upp á á brúarstöplana í Fossvoginum.

„Verkefni sem endurspeglar styrkleika okkar“

„Fossvogsbrú er verkefni sem hentar okkur fullkomlega. Ístak kemur með sterka staðarþekkingu- og mikla framkvæmdareynslu, og Aarsleff kemur með alþjóðlega sérfræðiþekkingu í stórum sjóvinnuverkefnum. ”Joint Venture”-samstarfið skilar okkur sameiginlegum styrk sem nýtist beint í svona flóknu verkefni.“

– Thomas Kofod Bentsen, Per Aarsleff A/S

Framundan er metnaðarfullt verk – Afhending sumarið 2028

Samningurinn við Betri samgöngur, er metinn á um 7,6 milljarða var undirritaður 20.nóvember 2025. Undirbúningsvinna er þegar komin í gang og við hlökkum til að hefjast handa.

Við hjá Ístaki erum spennt að leggja okkur fram við að skapa öruggari, skilvirkari og nútímalegri samgöngur fyrir íbúa og gesti Höfuðborgarsvæðisins – og taka þátt í að móta framtíð Höfuðborgarsvæðisins.

Verksamningur undirritaður um smíði Fossvogsbrúar

Thu, 20 Nov 2025 14:26:00 GMT

Ístak og Per Aarsleff AS hafa í samstarfi, gengið til samninga við Betri samgöngur um byggingu Fossvogsbrúar.

Tilboð samstarfsfélaganna reyndist hagstæðara af tveimur gildum tilboðum og nemur samningsfjárhæðin um 7.661 milljónum króna. Samningurinn var undirritaður rafrænt í Fossvogi þar sem framkvæmdir við landfyllingar standa nú yfir. Fyrir hönd Betri samgangna undirritaði Davíð Þorláksson framkvæmdastjóri og fyrir hönd Ístaks Karl Andreassen forstjóri.

Fossvogsbrú er lykilhluti fyrstu lotu Borgarlínunnar og mun bæta samgöngur fyrir Strætó, gangandi og hjólandi. Brúin verður jafnframt mikilvæg tenging í stígakerfi höfuðborgarsvæðisins og stytta ferðatíma á milli helstu vinnu- og þjónustusvæða.

Gert er ráð fyrir að allt að 10.000 manns fari um brúna daglega þegar Borgarlínan verður komin í fulla virkni. Með auknu aðgengi, betri tengingum og léttari umferð mun Fossvogsbrú hafa jákvæð áhrif á samgöngur á öllu höfuðborgarsvæðinu og verða áberandi kennileiti til framtíðar.

Þennan sama dag fagnar Ístak 55 ára afmæli fyrirtækisins og gleðilegt að slík undirskrift hitti á sama dag.

Fyrirmyndarfyrirtæki árið 2025

Tue, 28 Oct 2025 12:13:00 GMT

Ístak er á meðal 2,6% íslenskra fyrirtækja sem uppfylla skilyrði Viðskiptablaðsins og Keldunnar og telst því Fyrirmyndarfyrirtæki í rekstri árið 2025.

Fyrirtæki þurfa að uppfylla ströng skilyrði um afkomu, eiginfjárhlutfall, tekjur og eignir og er það okkur heiður að vera á lista Viðskiptablaðsins og Keldunnar í ár.

Þessi viðurkenning er staðfesting á fagmennsku, áreiðanleika og traustri starfsemi Ístaks.

Við þökkum starfsfólki okkar og samstarfsaðilum fyrir framlag þeirra til árangursins, án ykkar væri þetta ekki mögulegt.

Samkomulag náð eftir langa bið

Fri, 17 Oct 2025 19:45:28 GMT

Ístak og bæjaryfirvöld í Nuuk hafa náð samkomulagi sem tryggir opnun stærsta skóla Grænlands haustið 2026. Skólinn, sem stendur við aðalgötuna í hjarta Nuuk, er eitt umfangsmesta verkefni sem íslenskt verktakafyrirtæki hefur tekið að sér erlendis.

Byggingin, sem er í sjö samtengdum húsum og að flatarmáli um 18.000 fermetrar, var reist í alverktöku af Ístaki, með Verkís sem verkfræðihönnuð. Skólinn mun hýsa 1.200 grunnskólanemendur og 120 leikskólabörn. Utan skólatíma verður húsnæðið nýtt sem menningar- og félagsmiðstöð bæjarbúa.

Byggingarframkvæmdir hófust eftir að samningar voru undirritaðir í desember 2019 fyrir 615 milljónir danskra króna, eða um tólf milljarða íslenskra króna. Vegna heimsfaraldurs Covid-19 og ágreinings um brunavarnir tafðist opnun skólans, en nú hefur samkomulag náðst um uppsetningu vatnsúðunarkerfis í öllum byggingum.

Karl Andreassen, forstjóri Ístaks, segir þetta mikilvæg tímamót fyrir alla aðila: „Það er náttúrlega rosalega erfitt að horfa á svona byggingu standa auða, sérstaklega þegar þörf er á henni. Þess vegna hefur þetta bara verið mjög erfitt – og erfitt fyrir samfélagið allt á Grænlandi að horfa upp á tóma byggingu þarna fyrir tólfhundruð börn. Við fögnum því gríðarlega að lausn sé nú fundin.“

Samkomulag náð eftir langa bið

Fri, 17 Oct 2025 15:05:00 GMT

Nýtt hjúkrunarheimili í Boðaþingi vígt

Wed, 03 Sep 2025 09:51:00 GMT

Í gær fór fram formleg vígsla nýs hjúkrunarheimilis Hrafnistu að Boðaþingi í Kópavogi, vígsluathöfnin var hin glæsilegasta og margt var um manninn.

Ístak er stolt af því að hafa staðið að byggingu þessa nútímalega og vandaða heimilis sem mun bæta þjónustu við eldri borgara á höfuðborgarsvæðinu til framtíðar.

Framkvæmdir við fjölnota íþróttahús í Borgarbyggð í góðum farvegi

Fri, 29 Aug 2025 11:15:00 GMT

Ístak byggir nýtt fjölnota íþróttahús í Borgarbyggð og ganga framkvæmdir samkvæmt áætlun. Stálgrind hússins rís þessa dagana og fer nú að myndast skýr heildarmynd af verkinu.

Frá upphafi hefur Ístak lagt sérstaka áherslu á að vinnan fari fram á öruggan og faglegan hátt, byggt er á svæði þar sem mikil gangandi umferð er og sér í lagi mikið af börnum. Í upphafi framkvæmdanna voru settar upp auknar öryggisráðstafanir fyrir gangandi vegfarendur vegna aukinnar þungaumferðar á svæðinu. Þær hafa reynst vel og er ánægjulegt að sjá verktaka og samfélagið vera samstíga um að tryggja öryggi allra sem um svæðið fara.

Húsið verður bæði einangrað og upphitað og mun skapa fyrsta flokks íþróttaaðstöðu fyrir sveitarfélagið. Með tilkomu þess munu bæði börn og fullorðnir í Borgarbyggð fá nútímalega aðstöðu til æfinga og fjölbreyttra viðburða.

Áætlað er að íþróttahúsið verði tilbúið til notkunar haustið 2026.

Ístak byggir upp innviði fyrir fyrsta vindorkuver Íslands

Mon, 28 Apr 2025 14:27:00 GMT

Ístak hefur gert samning við Landsvirkjun um byggingu Vaðölduvers, fyrsta vindorkuvers landsins. Samningurinn, sem nemur rúmum 6,8 milljörðum króna, var undirritaður í kjölfar útboðs þar sem sjö tilboð bárust. Tilboð Ístaks var metið hagstæðast, með hliðsjón af samtölu fjárhæðar og kolefniskostnaðar.

Umfangsmikil og fjölbreytt verkefni framundan

Ístak mun annast byggingu járnbentra og steinsteyptra undirstöða fyrir 28 vindmyllur ásamt gerð kranastæða fyrir uppsetningu þeirra. Þá felur verkefnið einnig í sér alla jarðvinnu á svæðinu, lagningu vatnsveitu og fráveitu, gerð malarplana og umfangsmikla lagningu lagna.

Auk þess mun Ístak reisa um 850 fermetra steinsteypta spennistöð sem mun tengjast við tengivirki Landsnets og hýsa búnað og verkstæði fyrir rekstur vindorkuversins. Verkefnið krefst einnig lagningar yfir 14 kílómetra af háspennustrengjum sem munu tengja hverja vindmyllu við spennistöðina.

Í framkvæmdunum verður notað um 14.000 rúmmetrar af steypu og áætlað er að grafa um 300.000 rúmmetra af jarðvegi og bergi.

Framkvæmdatími og verklok

Áætlað er að framkvæmdir hefjist í maí 2025 og ljúki sumarið 2027. Fyrri hluti verkefnisins, þar sem hluti vindmyllanna verður gangsettur, verður tilbúinn árið 2026.

Stolt af þátttöku í orkuskiptum Íslands

Ístak lagði fram lægsta tilboðið í verkið og sýndi jafnframt fram á hagstætt kolefnisspor, sem var mikilvægur þáttur í valferlinu. Meðal aðgerða sem stuðla að sjálfbærni eru notkun rafmagnsbúnaðar og lífdísilolíu fyrir stærri vinnuvélar, auk sérstakrar áætlunar um hagræðingu í flutningum og efnistökum til að lágmarka losun.

Það er Ístaki mikill heiður að taka þátt í þessu sögulega verkefni sem markar tímamót í innleiðingu endurnýjanlegrar orku á Íslandi. „Þetta verkefni gefur okkur einstakt tækifæri til að nýta fjölbreytta reynslu okkar og leggja áherslu á sjálfbærar lausnir,“ segir Karl Andreassen forstjóri Ístaks.

Ístak leggur sitt af mörkum til styrktar Píeta-samtökunum

Wed, 16 Apr 2025 10:11:00 GMT

Í sumar hyggst Bergur Vilhjálmsson ganga frá Goðafossi til Reykjavíkur – yfir Sprengisand – með 100 kílóa kerru í eftirdragi! Markmið göngunnar er að vekja athygli á mikilvægi andlegrar heilsu og safna fé til styrktar Píeta-samtökunum.

Eins og einhverjir muna gekk Bergur Hvalfjörðinn, með 210 kg byrði til styrkar sama málefni, í fyrra.

Faðir Bergs er starfsmaður Ístaks og leitaði til Vélsmiðjunnar okkar í vetur eftir aðstoð við þetta verkefni, sem var auðsótt. Starfsmenn vélsmiðjunnar hönnuðu gripinn og settu saman af sinni alkunnu snilld.

Við erum stolt af því að taka þátt í þessu verkefni og óskum Bergi góðs gengis á þessari mögnuðu vegferð!

Hægt er að lesa meira um verkefnið hér:

Hlekkur á frétt

#TeamVarnargarðar - Sameinast um stuðning við UMFG

Tue, 18 Mar 2025 10:18:00 GMT

Verktakar sem hafa unnið saman við gerð varnargarða við Grindavík og Svartsengi síðan í nóvember 2023 hafa tekið höndum saman og verða aðalstyrktaraðili Knattspyrnudeildar Ungmennafélags Grindavíkur (UMFG). Að auki hafa stærstu birgjar þeirra einnig gengið til liðs við þetta verkefni, sem er einstakt dæmi um samhug og samstöðu í kjölfar mikilla áskorana sem samfélagið í Grindavík hefur gengið í gegnum.

UMFG missti alla sína styrktaraðila í kjölfar náttúruhamfaranna þar sem þeir voru flestir úr Grindavík og urðu fyrir jafn miklum áhrifum og félagið sjálft. Í ljósi þess tóku eftirtaldir verktakar og birgjar sameiginlega ákvörðun um að styðja við UMFG og hjálpa félaginu að endurreisa starfsemi sína:

▪️Ístak hf.

▪️Íslenskir Aðalverktakar hf

▪️Sveinsverk ehf

▪️Ingileifur Jónsson ehf

▪️Fossvélar

▪️Hefilverk ehf

▪️Skeljungur

▪️ Klettur

▪️ Kraftvélar

▪️Armar Ehf

▪️Berg Verktakar ehf

Samstarfið hefur einnig verið tákngert með sérstöku lógói sem vísar í form varnargarðanna og bókstafinn „G“ fyrir Grindavík, sem undirstrikar tengslin á milli þessara aðila og samfélagsins sem þeir styðja. Hönnunarstofan Kolofon og Baldur Kristjánsson ljósmyndari lögðu verkefninu lið með hönnun merkis og myndatöku.

Við óskum UMFG góðs gengis á komandi leiktíð, Áfram Grindavík!

Fyrsta flugvélin afgreidd í nýjum landgöngubrúm í Keflavík

Thu, 06 Mar 2025 10:03:00 GMT

Stór áfangi náðist í gær á Keflavíkurflugvelli þegar fyrsta flugvélin tók á móti farþegum í gegnum nýja landgöngubrú ein af fjórum sem Ístak hefur unnið að. Þetta var prufukeyrsla en í næstu viku má reikna með að starfsemin verði komin á fullt.

Þessi áfangi er einn af síðustu hlutum SLN18-verksins á Keflavíkurflugvelli, þar sem Ístak hefur gegnt hlutverki stýriverktaka ásamt því að annast mannvirkjagerð og innri frágang, auk þess að byggja flughlaðið sjálft (NTA22). Þessi framkvæmd hefur leitt til mikilla breytinga í Leifsstöð.

Komusalur, Duty Free og veitingasvæðið hafa stækkað, og nýr glæsilegur biðsalur hefur bæst við með fjórum nýjum landgöngubrúm og rútuhliði. Að auki hefur verið byggð ný vöru- og ruslamóttaka fyrir rekstur. Áfram verður unnið að innréttingu skrifstofubyggingar á fjórðu hæð.

Nýtt svið - Innri þjónusta

Wed, 22 Jan 2025 12:33:00 GMT

Hjá Ístak leggjum við stöðugt áherslu á að finna leiðir til að gera enn betur.

Til að tryggja framúrskarandi þjónustu við verkefnin okkar kynnum við nú nýtt svið, Innri þjónusta. Þar sem við sameinum fjórar stoðdeildir undir eina heild til að styrkja stöðu okkar sem leiðandi verktaka á Íslandi.

Þessar deildir eru:

Gæða- og öryggisdeild
BIM og tækniþróun
Áætlanadeild
Innkaupadeild

Thomas Skov Jensen leiðir nýja sviðið og hefur jafnframt tekið sæti í framkvæmdastjórn.

Markmið breytinganna:

Að færa þjónustuna nær verkefnum okkar og tryggja markvissa og skilvirka þjónustu.
Að veita stjórnendum og tæknimönnum heildstæða og faglega þjónustu sem stuðlar að betri þekkingarmiðlun og bættu upplýsingaflæði.
Að styðja þróun verkefna og tilboðsvinnu með því að samræma vinnubrögð milli kjarnadeilda.

Ávinningur breytinganna:

Aukið öryggi og gæði með því að gera ávallt betur í framkvæmdum.
Betri stuðningur við hvert verkefni frá upphafi til enda.
Framsæknari nálgun á verkefni með því að hámarka nýtingu á tækni og sérhæfðri þekkingu innan Ístak.

Við erum sannfærð um að þessar breytingar efli getu okkar til að mæta framtíðaráskorunum og aðstoða við að tryggja framúrskarandi árangur í öllum verkefnum okkar.

Jólakveðjur frá Ístak

Fri, 20 Dec 2024 11:25:00 GMT

Ístak óskar viðskiptavinum sínum og samstarfsaðilum gleðileg jól og farsælt komandi ár.

Fyrsta skóflustungan - Safamýri

Wed, 09 Oct 2024 16:55:00 GMT

Fyrsta skóflustungan fyrir tvö ný fjölbýlishús fyrir Bjarg íbúðafélag var tekin í dag 9. október 2024 af Einari Þorsteinssyni borgarstjóra, aðstoðarmanni hans og fulltrúum Bjargs, ASÍ, BSRB og Ístaks.

Bjarg íbúðafélag mun reisa 40 leiguíbúðir í tveimur fjögurra hæða fjölbýlishúsum við Safamýri 58-60, í Reykjavík. Áætlað er að íbúðirnar verði tilbúnar til leigu í júní 2026. Íbúðirnar verða tveggja til fimm herbergja.

Ístak mun sjá um byggingarframkvæmdirnar, arkitektahönnun er í höndum A2F og Gríma arkitekta, Kriston sér um raflagnahönnun og Ferill verkfræðistofa um verkfræðihönnun.

100 ára starfsafmæli fagnað

Fri, 20 Sep 2024 17:57:00 GMT

Í dag var haldið upp 100 ára starfsafmæli bræðranna Steindórs Óla Ólason og Jón Gils Ólason hjá Ístak. Eiga þeir hvor farsæl 50 ár að baki hjá fyrirtækinu. Starfsferill þeirra spannar víðtæk verkefni, frá virkjunum og hafnargerð til gangagerðar, vegagerðar og gerð varnargarða hér á Íslandi en einnig í Færeyjum, Noregi, Tansaníu og víðar.

Steindór Óli Ólason hóf störf hjá Ístak árið 1974 sem sumarmaður, fyrstu árin vann hann m.a. við Mjólkárvirkjun og í fleiri innlendum verkefnum. Verkefni hans hafa verið fjölbreytt, en meðal þeirra eru jarðvinna, hafnargerð og sprengivinna. Á árunum 1985-1989 stýrði hann hafnargerð í Færeyjum. Steindór starfaði síðar sem verkstjóri í stórum verkefnum eins og Blönduvirkjun, Vestfjarðagöngum, Hvalfjarðargöngum og Fáskrúðsfjarðargöngum. Hann hefur einnig verið við störf í Grænlandi og Noregi, þar sem hann vann að hafnargerð, gangagerð og virkjunum. Steindór starfar í dag sem verkstjóri yfir varnargörðunum.

Jón Gils Ólason hóf störf hjá Ístak árið 1973 sem aðstoðarmaður í mælingum við vegagerð. Árið 1979 hóf hann störf hjá Pihl í Færeyjum, þar sem hann vann við flugvallargerð. Hann hefur víða komið að framkvæmdum um allan heim, m.a. í Yemen, Tansaníu og Maldivum. Hann starfaði við frárennsliskerfi, vegagerð og hafnargerðir í mörgum löndum og sinnti lykilhlutverki í framkvæmdum eins og Hvalfjarðargöngum, Hirtshals hafnargerð og Quorlortorsuaq virkjun á Grænlandi. Frá árinu 2017 hefur Jón verið verkstjóri véladeildar Ístaks.

Bræðurnir hafa á ferli sínum unnið ómetanlegt starf fyrir Ístak, bæði hérlendis og erlendis, og hafa sett mark sitt á margar stórframkvæmdir. Ístak þakkar þeim bræðum fyrir sitt einstaka framlag til fyrirtækisins.

Nýr hornsteinn lagður í Sögu

Thu, 22 Aug 2024 11:14:00 GMT

Áslaug Arna Sigurbjörnsdóttir háskóla-, iðnaðar- og nýsköpunarráðherra, og Jón Atli Benediktsson, rektor Háskóla Íslands, lögðu í gær nýjan hornstein að Sögu við Hagatorg. Endurbætur í Sögu eru langt komnar og reikna má með að starfsfólk og nemendur Háskóla Íslands flytji inn í húsið síðar í haust.

Framkvæmdir á Sögu hafa staðið yfir frá árinu 2022 en ríkið og Félagsstofnun stúdenta festu kaup á húsnæðinu í lok árs 2021. Þar verður ýmis starfsemi Háskóla Íslands og tengdra aðila, þar á meðal Menntavísindasvið Háskóla Íslands, sem flyst úr Stakkahlíð og Skipholti, og upplýsingatæknisvið skólans auk fleiri starfseininga. Auk þess eru í Sögu 111 nemendaíbúðir á vegum Félagsstofnunar stúdenta en fyrstu nemendurnir fluttu þangað inn í fyrravor.

„Það er afar ánægjulegt að nú hillir undir verklok við endurbætur á Sögu og að húsið verði tekið í notkun á ný. Saga stendur í hjarta háskólasvæðisins og mun verða gríðarleg lyftistöng fyrir Háskóla Íslands og Félagsstofnun stúdenta. Í húsinu verður Menntavísindasvið HÍ, margvísleg önnur háskólastarfsemi og stúdentaíbúðir auk þess sem þar verður fjölbreytt þjónusta sem mun laða að sér gesti og gangandi. Saga á sér glæsta sögu en nú er komið að kaflaskilum og við leggjum ríka áherslu á að færa húsið inn í nýja tíma og að þar verði blómleg og lifandi starfsemi,“ segir Jón Atli Benediktsson, rektor Háskóla Íslands.

Skrifað undir verksamning vegna göngu- og hjólabrúar yfir Sæbraut

Fri, 09 Aug 2024 12:41:00 GMT

Bergþóra Þorkelsdóttir, forstjóri Vegagerðarinnar, og Hjálmur Sigurðsson, framkvæmdastjóri mannvirkja hjá Ístaki, skrifuðu undir verksamning vegna göngu- og hjólabrúar yfir Sæbraut í Reykjavík þann 31. júlí sl. Framkvæmdir hefjast nú í ágúst og endanlega verklok eru áætluð í apríl 2025. Brúin er samstarfsverkefni Vegagerðarinnar og Reykjavíkurborgar.

Verkið snýst um byggingu göngu- og hjólabrúar yfir Sæbraut, sem tengist við Snekkjuvog/Barðavog í vestri og Tranavog/Dugguvog í austri. Brúin mun bæta umferðaröryggi verulega, ekki síst fyrir skólabörn í Vogabyggð.

Brúin verður yfirbyggð og við báða enda hennar verður stigahús og lyfta. Góð lýsing verður á og við brúna. Verkís hannaði mannvirkið og Ístak mun sjá um framkvæmdir. VBV verkfræðistofa hefur eftirlit og umsjón á sinni könnu. Vegagerðin hefur yfirumsjón með verkinu fyrir hönd verkkaupa.

Til að varna því að ökutæki rekist upp í brúna verður skiltabrúm komið fyrir sitt hvoru megin við hana. Brúin mun þjóna hlutverki sínu þar til Sæbraut verður sett í stokk.

Verkið er fjármagnað af Samgöngusáttmálanum, sem gerður var 2019 milli ríkisins og sveitarfélaganna sex á höfuðborgarsvæðinu.

Frétt frá Vegagerðin

Fréttir af Hótel Sögu

Tue, 09 Apr 2024 10:14:00 GMT

Þeir sem leið hafa átt fram hjá Hótel Sögu undanfarna mánuði hafa eflaust tekið eftir einkennilegri byggingu sem risið hefur þar sem áður var Grillið.

Ístak hefur nú unnið að endurbótum á allri byggingunni, bæði að innan og utan, síðan fyrri hluta árs 2022. Einn liður í þeim endurbótum var viðhald á Grillinu og kom fljótlega í ljós að byggingin var mjög illa farin. Því var tekin ákvörðun um að endurbyggja það frá grunni. Til að tryggja gæði nýbyggingarinnar og verja framkvæmdina fyrir veðri og vindum var jafnframt ákveðið að klæða vinnupalla sem þegar var búið að reisa utan um Grillið auk þess að bæta við sérstakri þakyfirbyggingu. Þar með var búið að pakka öllu Grillinu inn og skapa þannig fyrirmyndar aðstæður til endurbóta.

Þakyfirbyggingin er þannig úr garði gerð að auðvelt er að fjarlægja segldúk af völdum svæðum eða hluta yfirbyggingarinnar tímabundið. Það hefur reynst vel við hífingar á byggingarefnum og við steypuvinnu. Órólegir vegfaraendur geta því andað léttar, yfirbyggingin er ekki komin til að vera heldur mun rísa nýtt Grill í upprunalegri mynd, bara betra.

Framkvæmdum miðar vel. Uppsteypa klárast á næstu dögum og er vinna við reisingu stálvirkis þegar hafin. Í framhaldi verður svo farið í þakvinnu og húsinu lokað. Að því loknu verður yfirbyggingin fjarlægð.

Grillið á Hótel Sögu

Thu, 14 Mar 2024 10:46:00 GMT

Afhjúpað var í Fréttum Stöðvar 2 á dögunum hvað leyndist undir þessu einkennilega húsi sem er nú á toppi Hótel Sögu. En sett hefur verið upp tímabundin yfirbygging meðan unnið er að endur uppbyggingu á húsnæði Grillsins sem byggt verður að ný í upprunalegri mynd.

Klæðningin á nýja skólanum í Nuuk er tilbúin.

Thu, 14 Mar 2024 10:39:00 GMT

Klæðningin á skólanum er einstaklega lífleg og falleg, enda mikil hugmyndafræði á bakvið hana. Hönnunin á klæðningunni sem KHR Architect eiga heiðurinn af er afrakstur könnunarferlis, bæði hugmyndalega, skapandi og tæknilega. Þar sem samspil landslags, grænlenskra hefða, litríkra bygginga landsins og dýralíf og gróður sameinast á veggjum skólans.

Húsið er klædd með álplötum og lerki. Svartar álplötur hafa verið gataðar og móta fyrir myndunum en þar undir eru litaðar álplötur í ólíkum litum sem gefa dýrunum og plöntunum líf.

Skemmtileg staðreynd: Hnúfubakurinn er í mælikvarðanum 1:1!

Stefnt er að Atuarfik Inussuk ljúki í sumar, tilbúinn til að taka á móti 1.200 skólabörnum.

Skemmdir á hitaveitulögn- Suðurnes

Tue, 27 Feb 2024 11:18:00 GMT

Líkt og almenningur veit þá olli eldgosið sem hófst þann 8. febrúar umtalsverðum skemmdum á hitaveitukerfi fyrir Suðurnesið. Eldgosinu fylgdi kröftugt hraunflæði sem flæddi yfir Grindavíkurveg og í átt að Svartsengi. Með þeim afleyðingum að heituvatnslögnin sem þjónustar Suðurnesið rofnaði. Þetta gerði það að verkum að um 30.000 íbúar voru án heits vatns og húshitunar og mikill kuldi í kortunum.

Farið var í að tengja nýju lögnina sem fór undir hraun í þeirri von að hún hefði ekki tjónast, gekk vel að tengja og var vatni hleypt á lögn seinni part 9 feb. þegar vatni var hleypt á féll þrýstingur skyndilega og gufustrókur kom upp um hraunið og ljóst að lögnin undir hraunið var skemmd og ekki nothæf.

Á fundi með Almannavörnum var ákveðið að leggja aðra lögn yfir hraunið til að koma vatni á bæjarfélagið. Þar sem hraun var aðeins sólahrings gamalt þurfti að finna leið til að koma lögn fyrir hraunið sem var um 400m breytt í lagnastæði, áætlað var að nota þyrlu landhelgisgæslunar og stóra krana ásamt sérhæfðum búnaði frá Landsnet við að draga lögnina yfir, en á sama tíma að reyna að gera veg að hluta eða öllu leiti yfir hraunið eins fljótt og hægt væri. Vinnan við að ryðja veg yfir nýja hraunið gekk það vel strax að ljóst var að ekki þyrfti að fara í þyrlu æfingar, og í raun hægt að leggja nýju lögnina á hraunveginn. Vinna við undirbúning hófst strax um kvöldið með það markmið að endurheimta heitt vatn fyrir íbúa sem allra fyrst. Fyrst var áætlað að sækja hluta af gömlu Grindarvíkuræðinni en fljótlega fannst hentugt efni á Reykjanesi og var það flutt á staðinn.

Ístak var fengið til að verkefnastýra framkvæmdinni og kom vélsmiðja Ístaks sterkt inn í þá vinnu, Í samstarfi við HS Orku þá voru fengin sex reynslumikil fyrirtæki í slíkri vinnu ásamt þjónustu aðilum við jarðvinnu, hífingar og flutning, sett upp vaktakerfi og strax hafist handa. Í heildina komu um 80 manns að aðgerðinni.

Vel gekk að fylgja skipulagi og gekk gríðarlega vel með þessum hóp, rör var soðið saman í tvær lengjur sem síðan var dregið út á hraunið og yfir það með 50t jarðýtu. Þegar rörið var komið yfir voru tengingar kláraðar. Aðeins liðu 41 klst frá því að ákvörðun var tekin þar til vatni var hleypt á lögn.

Þessi viðbrögð og aðgerðir undirstrika mikilvægi samvinnu og skipulags í neyðaraðstæðum, viljum við hrósa sérstaklega þeim ósérhlífnu fagmönnum sem komu að þessari framkvæmd það var unun að sjá hversu samstilltur hópurinn var.

115 tonna jarðýta til starfa við varnagarðana

Mon, 19 Feb 2024 11:12:00 GMT

Frá því í lok nóvember sl. þá hefur á vegum Ístaks verið unnið í að skoða að fá til landsins stóra jarðýtu vegna vinnu við varnargarða í kringum Svartsengi og við Grindavík.

Fyrir sléttum tveimur vikum þá var tekin ákvörðun um að flytja heim vél sem okkur stóð til boða að leigja frá, RG / Rental Group í Noregi þetta er ný uppgerð Caterpillar D11 jarðýta sem vegur um 115 tonn og eru þessar vélar með stærstu fjöldaframleiddu jarðýtum í heiminum.

Vélin var flutt frá Vikersund í Noregi til Hirtshals í Danmörku og þaðan heim til Íslands, um þriggja sólahringa seinkun var vegna veðurs á að skipið kæmi til Þorlákshafnar.

Um miðjan dag á fimmtudag hófst samsetning á vélinni og var hún tilbúin til vinnu á laugadagsskvöld.

Það er ótrúlega gaman að sjá að það sé mögulegt að koma jafn stóru tæki til landsins á þetta stuttum tíma og væri það ekki hægt fyrir okkur hjá Ístak nema með samstilltu átaki margra og skipta þar sköpum öflugar stoðdeildir Ístaks.

Með tilkomu þessara jarðýtu er verið að efla flotann og gera viðbragðið enn sterkara ef eitthvað kemur upp á og ef reisa þarf varnargarða í hvelli. Þær eru afkastamiklar og þörf á að vera með tvær jarðýtur við vinnu garðanna til að geta brugðist við. Framkvæmdirnar munu ganga betur og hraðar fyrir sig með nýju jarðýtuna í vinnu þar að auki er jarðýtan tilvalin í allar stórar jarðvegsframkvæmdir.

Endurmeta vinnu við varnargarða

Fri, 19 Jan 2024 10:03:00 GMT

Vinna við varnargarða í Grindavík liggur niðri á meðan verið er að endurmeta stöðuna. Hjálmur Sigurðsson, framkvæmdastjóri mannvirkja segir að mælingar hafi staðið yfir í gær enda hafi land breyst við jarðeldana norðan við Grindavíkurbæ. Hraunflæðilíkön eru ekki gild lengur vegna breytinganna. Út úr þeirri vinnu mun koma einhver niðurstaða sem hann reiknar með að verði lögð fyrir yfirvöld til samþykktar.

Landið mikið sprungið og kvika liggur grunnt

Land í Grindavíkurbæ er mikið sprungið, kvika liggur grunnt í suðurenda kvikugangsins og virðist eiga auðvelt með að komast upp á yfirborðið. Áfram eru líkur á að nýjar gossprungur opnist án fyrirvara samkvæmt upplýsingum frá Veðurstofu Íslands. Þá stafar áfram hætta af sprungum innan Grindavíkur og að jarðvegur hrynji ofan í þær.

Miklar hreyfingar hafa átt sér stað í tengslum við sigdalinn í austurhluta bæjarins sem urðu að mestu leyti á þeim sprungum sem mynduðust 10. nóvember og þegar höfðu verið kortlagðar. Kvikusöfnunin heldur áfram undir Svartsengi.

Einn og hálfur metri hrauns yfir mikilvægan brunn

Segir Hjálmur að verktakar hafi í staðinn verið að vinna í stofnlögn kalda vatnsins inn í Grindavík en einn og hálfur metri af hrauni fór yfir mikilvægan brunn við Grindavíkurveg rétt sunnan við varnargarðinn við Grindavík og starfsmenn vinni við að moka því í burtu. Segir hann það ekki sérlega stórt verk en það taki tíma þegar unnið er með heitt hraun.

Þá segir Hjálmur að framkvæmdir standi yfir við nýjan veg við Bláa lónið. Til að varnargarðurinn við Svartsengi virki þarf að loka skörðum og þá þarf nýja aðkomuleið.

Þetta sé eini vegurinnn niður í Grindavík. Verið sé að leggja nýjan veg frá svæðinu við varnargarðana austast og inn á Bláa lóns-veginn aftur vestan við lónið. Að öðru leyti segir Hjálmur Sigurðsson að nú bíði verktakar við varnargarðana eftir því hvaða stefna verði tekin í framkvæmdum við þá.

Eldgos í Grindavík

Fri, 19 Jan 2024 09:58:00 GMT

Mikið hefur gengið á í vinnu okkar við Varnargarða við Grindarvík, þar sem vel hefur gengið síðustu daga.

Um kl 8:00 í gærmorgun sást bjarmi á lofti og fljótlega á eftir var farið af stað í að átta sig á staðsetningu sprungunnar. Það kom strax í ljós að gossvæðið var rétt við vinnusvæði Ístaks og vélar sem voru settar á hæsta punkt kvöldið áður til öryggis voru 400m frá sprungusvæði og hraun rann ákveðið í áttina að þeim. Þegar leyfi kom til að sækja vélarnar var farið upp með þyrlu til að meta aðstæður og síðan með góðu skipulagi og hóflegum skammti af hlaupum hjá mönnum sem almennt leggja ekki mikla stunda á það þá náðist að fjarlægja öll tækin.

Undanfarna daga hefur verið vinna í gangi við að útbúa nýjan Grindarvíkurveg til að hægt væri að loka 150m löngu skarði í aðal varnargarðinum. Ásamt því að unnið var í að verja veitulagnir til Grindarvíkur. Ráðist var í að loka þessu skarði strax og var unnið á fullu til kl 14:00 í gær, þá þurfti að rýma en á þeim tímapunkti var 99% komið í skarðið.

Um kl 15:30 var farið af stað aftur og gerður 500m langur garður fyrir neðan skarðið til að taka það sem kom yfir garðinn í dag og er þeirri vinnu lokið. Næstu skref er að halda áfram í neyðargörðum vestur fyrir Grindarvík ásamt mögulegri vinnu inn í bænum til að stýra hraun streyminu.

Svona aðgerðir væri ekki hægt að fara í nema með góðu samstarfi við almannavarnir og björgunaraðila, t.d er sérsveit lögreglustjóra búinn að vera með 1-2 dróna stanslaust á lofti yfir okkur í dag til að vakta og vera til stuðnings, starfsmenn voru einnig með súrefni ef þörf kæmi upp, allir starfsmenn voru með gasgrímur með sér og flestir einnig með gasmæla. Rétt er að taka það fram að vindur var hagstæður og lítil mengun var að mælast.

Hugur okkar er með íbúum Grindavíkur á þessum erfiðu tímum.

Jólakveðja frá Ístak

Fri, 22 Dec 2023 11:09:00 GMT

Ístak óskar landsmönnum öllum gleðilegra jóla og farsælt komandi ár.

Sérstakar þakkir til samstarfsaðila og viðskiptavina okkar á árinu sem er að líða og við lítum björtum augum fram á næsta ár.

Gamli hornsteinninn á Sögu fannst í dag

Wed, 08 Nov 2023 14:25:00 GMT

Það er ekki á hverjum degi sem okkur hjá Ístak líður eins og Indiana Jones en í dag var svoleiðis dagur á Hótel Sögu.

Í maí fundum við forlátan silfurplatta sem vísaði á hornsteininn en líklega eru mörg ár síðan hann hékk á veggnum þar sem hornsteinninn var innmúraður. Síðan þá höfum við haft augun opin fyrir hornsteininum sjálfum en enginn hafði vitneskju um staðsetninguna, jafnvel þó leitað hafi verið til elstu manna.

Við rif á lyftum og breytingar á lyftuhúsi í dag fannst svo járnhylki sem við skárum upp og í því fundust þessi leyndardómsfullu skjöl sem legið hafa ósnert í rúm 62 ár. Það vildi svo skemmtilega til að skjölin bárust okkur á miðjum verkfundi með fulltrúa verkkaupa og eftirlits og var þeim afhentur fjársjóðurinn til varðveislu.

Byggt yfir Hótel Sögu

Thu, 19 Oct 2023 13:58:00 GMT

Í september var farið í þá framkvæmd að byggja yfir Grillið á Hótel Sögu. Ístak hefur leitað ýmissa lausna við að koma upp yfirbyggingu til bráðabirgða svo hægt sé að athafna sig við umfangsmiklar endurbætur á Grillinu án áhrifa frá veðri og vindum. Fundin var lausn frá Altrad-Dessa í Bretlandi sem á að standast allar þær kröfur sem við gerum varðandi vindálag og snjó. Þeir sendu sérfræðing til okkar sem fór yfir kerfið með okkar starfsfólki og stýrði uppsetningunni.

Það verður áhugavert að sjá hvernig þakið reynist við íslenskar aðstæður en hingað til höfum við ekki séð sambærilegar lausnir nýttar hér á landi.

Nýr töskusalur á Keflavíkurflugvelli

Tue, 12 Sep 2023 10:41:00 GMT

Nýr töskusalur var vígður 31. ágúst 2023.

Nýi töskusalurinn á Keflavíkurflugvelli er á jarðhæð í nýrri viðbyggingu við flugstöðina, svokallaðri austurálmu. Í honum eru þrjú stærri og breiðari farangursmóttökubönd, en gert er ráð fyrir að síðar geti tvö bönd bæst við. Samhliða því verða farangursböndin í gamla töskusalnum tekin niður en á því svæði verður síðar opnuð ný og endurbætt fríhafnarverslun fyrir komufarþega.

Nýja viðbyggingin er á þremur hæðum auk kjallara og hófust framkvæmdir um mitt ár 2021. Á dögunum var einnig tekið í notkun nýtt og afkastameira farangursmóttökukerfi sem staðsett er í kjallara byggingarinnar. Áætlað er að framkvæmdum við bygginguna ljúki á síðari hluta næsta árs þegar meðal annars verður tekið í notkun stærra veitinga- og biðsvæði á annarri hæð og fjórir nýir landgangar.

Austurálman er rúmir 20 þúsund fermetrar að stærð, en til samanburðar er Laugardalshöll um 17 þúsund fermetrar. Austurálman er 124,5 m að lengd, 66 m á breidd og 31 m á hæð.

Ístak óskar Isavia og öllum komandi ferðalöngum til hamingju með þennan áfanga.

En til gamans má skoða komandi breytingar á flugvellinum hér - www.kefplus.is

Ný akbraut (MIKE) tekin í notkun á Keflavíkurflugvelli

Tue, 08 Aug 2023 15:35:00 GMT

Ístak lauk nýverið við verkið MIKE á Keflavíkurflugvelli. Akbrautin MIKE tengir saman flughlað flugstöðvarinnar og flugbraut. Akbrautin er fyrsta viðbót Isavia við flugbrautarkerfið en allar aðrar viðbætur voru lagðar af NATO eða Bandaríkjaher.

Akbrautin er engin smásmíði þar sem hún er 1200 metra löng og 35 metrar á breidd. Til samanburðar myndi malbikið duga til að malbika 35 fótboltavelli. Kostnaður við akbrautina eru tæpir 4 milljarðar króna. Framkvæmdir við Mike hófust árið 2022 en þeim lauk í sumarbyrjun 2023.

Markmiðið með framkvæmdinni er að bæta flæði og auka öryggi flugbrautakerfisins.

Fyrsta flugvélin sem ók eftir Mike var Fagradalsfjall, vél af gerðinni Boeing 737-Max-8 vél frá Icelandair sem var á leiðinni frá Keflavíkurflugvelli til Oslóar.

Formleg opnun nýrrar tvíbreiðrar brúar yfir Stóru-Laxá

Fri, 14 Jul 2023 14:45:00 GMT

Ný tvíbreið brú yfir Stóru-Laxá í Hreppum var formlega opnuð í gær, fimmtudaginn 13. júlí 2023. Þó hafði áður verið opnað fyrir umferð þann 25. júní 2023. Nýja tvíbreiða brúin kemur í stað einbreiðrar 120 m langrar brúar frá árinu 1985. Sigurður Ingi Jóhannsson innviðaráðherra og Bergþóra Þorkelsdóttir, forstjóri Vegagerðarinnar héldu stuttar ræður á brúnni áður en þau klipptu á borða til að marka hina formlegu opnun. Með þeim í því verkefni voru þeir Haraldur Þór Jónsson oddviti og sveitarstjóri Skeiða- og Gnúpverjahrepps og Jón Bjarnason oddviti Hrunamannahrepps. Stóra-Laxá liggur enda á mörkum sveitarfélaganna tveggja.

Hefð hefur verið fyrir því að ráðherra fari fyrstur yfir brýr eftir formlega opnun en í þetta sinn voru það börn af svæðinu sem fengu þann heiður en fararskjótarnir voru forlátir kassabílar sem þeir Haraldur og Jón ýttu yfir brúna.

Skeiða- og Hrunamannavegur (30) um Stóru-Laxá

Verkið sem Vegagerðin bauð út bar heitið; Skeiða- og Hrunamannavegur (30) um Stóru-Laxá. Í því fólst bygging brúar yfir Stóru-Laxá, gerð nýs vegkafla Skeiða- og Hrunamannavegar (30) beggja vegna, breikkun vegamóta við Skarðsveg og við Auðsholtsveg og gerð reiðstígs. Nýja brúin er til hliðar við gömlu brúna, tvíbreið, staðsteypt, eftirspennt bitabrú, 145 m löng í fjórum höfum. Lengd vegkafla er rúmlega 1000 m og lengd reiðstígs rúmir 300 m.

Tilboð í verkið voru opnuð 24. ágúst 2021. Ístak bauð rúma 791 m.kr. í verkið sem var tæplega 82 prósent af áætluðum verktakakostnaði. Skrifað var undir verksamning Vegagerðarinnar og Ístaks 23. september 2021. Framkvæmdir hófust í október það ár.

Með Ístak sem aðalverktaka störfuðu margir undirverktakar við útboðsverkið: Steypustöðin sá um steypuframleiðslu, Nesey annaðist jarðvinnu og vegagerð, VA-verktakar unnu við niðurlögn steypu í brúardekk, CCL sá um uppspennu, Bikun sá um klæðningar á vegum og Rekverk settu upp vegrið.

Tafir vegna kuldatíðar og afhendingu búnaðar

Verklok voru áætluð í lok september 2022 en brúin var opnuð fyrir umferð í júní 2023.

Vegna ytri aðstæðna urðu tafir á afhendingu búnaðar sem þurfti til brúargerðarinnar. Það varð þess valdandi að framkvæmdum seinkaði fram á vetur. Veturinn 2022-2023 reyndist afar kaldur með langvarandi frostatíð sem gerði erfitt um vik að steypa brúargólfið. Því var brugðið á það ráð að byggja yfir brúna og tjalda yfir og niður með hliðum að jörð. Kynt var bæði undir brúargólfið og einnig í tjaldinu yfir brúargólfinu áður en steypt var. Þar inni var orðinn um 10° c hiti þegar steypuvinna hófst. Steypuvinna við brúargólfið hófst að morgni þriðjudagsins 24. janúar og lauk seinnipart miðvikudagsins 25.janúar og hafði vinnan þá staðið yfir samfellt í 30 klukkustundir.

Brúnni forðað frá stórtjóni

Kuldatíðin hafði fleiri áhrif á framkvæmdina. Í janúar 2023 höfðu myndast klakastíflur í árfarveginum sem voru í þann veginn í bresta. Stefndi þá í stórtjón á brúnni sem var á viðkvæmu byggingarstigi. Við byggingu brúarinnar hafði árfarvegurinn verið þrengdur og verkpallar reistir yfir hann. Fyrirséð var að vatnsopið bæri ekki stóraukið vatnsrennsli með jakaburði. Til að bjarga málum var vegurinn að gömlu brúnni rofinn 19. janúar til að opna nýjan farveg fyrir ána og skapa svigrúm fyrir aukið vatnsrennsli. Næsta dag, þann 20. janúar, gerði asahláku eftir um sex vikna samfelldan frostakafla. Mikill ís var kominn á ána og því viðbúið að áin ryddi sig með miklu vatnsflóði og jakaburði. Þann 21. janúar, tveimur dögum eftir að vegurinn var rofinn, ruddi áin sig fram með miklu flóði og streymdi að hluta um hinn nýja farveg. Með stórvirkum vinnuvélum tókst starfsmönnum Ístaks að bægja frá ísjökum og halda rennslinu greiðu á meðan vatnselgurinn var mestur og forða nýja mannvirkinu frá skemmdum.

Opnað fyrir umferð á brú yfir Stóru Laxá

Mon, 10 Jul 2023 10:14:00 GMT

Búið er að hleypa umferð á brú Stóru Laxá en verið er að ganga frá lokafrágangi jarðvinnu.

Brúin hefur verið í byggingu frá því haustið 2021 en ýmsar áskoranir komu upp við byggingu brúarinnar, þar má helst nefna veður og vatnafar og efnisútvegun. Fljótlega eftir að framkvæmdir hófust minnti Ísland á sig og ef ekki var flóð á vinnusvæði var óveður.

Eftir krefjandi veðuraðstæður veturinn 2022/2023 var ákveðið að byggja yfir brúardekkið sem gerði gæfumun þegar kom að því að steypa brúardekkið.

Vegurinn var klæddur þriðjudaginn 20. júní og umferð hleypt á á laugardaginn 24. júní. Formleg vígsla brúarinnar er áætluð þann 13. júlí næstkomandi.

Það gleður okkur svo sannarlega að brúin sé klár og almenmingur geti keyrt um nýja tvíbreiða brú á leið sinni yfir Stóru Laxá.

Fyrsta skóflustungan af Steingerði

Tue, 04 Jul 2023 09:03:00 GMT

Fyrsta sporlausa jarðvarmavirkjun heims

Fyrsta skóflustungan fyrir hreinsistöðinni Steingerði við Hellisheiðarvirkjun var tekin fimmtudaginn 29. Júní. Með tilkomu hennar tekst að fanga nær allt koldíoxíð og brennisteinsvetni frá virkjuninni.

Það voru þau Gísli H. Guðmundsson framkvæmdastjóri bygginga hjá Ístaks, Edda Sif Pind Aradóttir, framkvæmdastýra Carbfix og Árni Hrannar Haraldsson framkvæmdastjóri Orku Náttúrunnar sem tóku fyrstu skóflustunguna að stöðinni.

Skóflustungan markar upphaf framkvæmda vegna Steingerðar sem er samstarfsverkefni Carbfix og Orku náttúrunnar. Markmið þess er að reisa öflugri hreinsistöð sem mun ásamt núverandi hreinsistöð, fanga nær allt koldíoxíð og brennisteinsvetni úr útblæstri Hellisheiðarvirkjunar og dæla því niður í nálæg basaltberglög til varanlegrar steinrenningar með Carbfix tækninni. Stefnt er að gangsetningu Steingerðar árið 2025 og verður Hellisheiðarvirkjun þar með nær sporlaus, fyrst jarðvarmavirkjana á heimsvísu.

Framkvæmdaverk Ístaks

Framkvæmdaverkið felur í sér byggingu húss fyrir starfsemina og lagninga vatns- og gaslagna í jörðu. Ásamt umtengingum bæði á stöðvarhússlóð og við tvær niðurrennslisholur sem eru nærri tengivirki Landsnets á virkjanasvæðinu. Húsið sjálft verður 262 m2 að grunnfleti á einni til tveimur hæðum með lagnagryfju í gólfinu. Húsið verður tvískipt annars vegar vélarsalur og hinsvegar þjónusturými.

Frá árinu 2017 hefur Carbfix átt í samstarfi við svissneska fyrirtækið Climeworks. Fyrirtækin hafa í sameiningu rekið tilraunastöð á Hellisheiði þar sem CO2 er fangað beint úr andrúmslofti og dælt niður í jarðlög þar sem það verður að steindum. Ístak byggir nú einnig hreinsistöðina Mammoth fyrir Climeworks sem er áætlað er að klárast í nóvember á þessu ári.

Utanríkisráðherra heimsækir Nuuk

Mon, 26 Jun 2023 14:22:00 GMT

Þann 23. júní 2023 kom Utanríkisráðherra Íslands Þórdís Kolbrún Reykfjörð Gylfadóttir ásamt aðalræðismanni Íslands í Nuuk Geir Oddsyni í opinbera heimsókn á vinnustað Ístaks í Nuuk.

Ístak vinnur að því að byggja leik og grunnskóla í Nuuk. Nýi skólinn leysir af hólmi tvo eldri skóla og gert er ráð fyrir að tólf hundruð nemendur stundi nám við hann. Skólinn stendur í miðbæ Nuuk við hlið Hótels Hans Egede, skammt frá stjórnarráði Grænlands og aðalverslunarmiðstöð bæjarins. Skólinn mun einnig þjóna hlutverks menningarmiðstöðvar og verður kærkomið hjartarými fyrir bæjarbúa Nuuk.

Fréttir af hringvegi um Hornarfjarðarfljót

Mon, 05 Jun 2023 09:53:00 GMT

Hornafjarðarfljót - Hringvegur

Framkvæmdin er í sveitarfélaginu Hornafirði í Austur-Skaftafellssýslu. Verkið felst í styttingu Hringvegarins um 12 km með gerð vegar er kemur til með að liggja yfir Hornafjörð norðanverðan.

Verkinu er skipt í fimm verkhluta. Verkhluti 8.01 felst í nýlögn Hringvegar (1) frá stöð 0 rétt vestan Hólmsvegar (9822) að stöð 18760 vestan Dynjandisvegar (9721) ásamt tengivegum og tengingum. Í verkhluta 8.02 felst smíði 52 m langrar brúar á Djúpá, í verkhluta 8.03 felst smíði 250 m langrar brúar á Hornafjarðarfljót, í verkhluta 8.04 felst smíði 114 m langrar brúar á Hoffellsá, í verkhluta 8.05 felst smíði 52 m langrar brúar á Bergá.

Það er góður gangur í verkinu eftir mikinn frost vetur og tala heimamenn um að þeir muni ekki eftir svona miklum frosthörkum í langan tíma. Því fylgdi síðan mikið vatnsveður með roki og seinna sandfoki. Áherslan hjá Ístak þessa dagana er að fylla í veginn til austurs svo hægt sé að komast að Hoffellsá. Búið er að fylla farglag á Djúpá og gera tengiveginn milli nýja þjóðvegar 1 og gamla þjóðvegar 1. Verið er að bíða eftir sigi í brúarstæði Hornafjarðaráar og eitt lag eftir þar. Þá er verið að vinna í farglagi í Bergá en það þarf á að standa í eitt ár, hinar styttra. Það er mikið af sigplötum sem þarf að setja niður og mæla reglulega. Verkstæðis skemma er að verða klár og verður það mikill munur fyrir starfsmenn, en það hefur truflað þjónustu við tækin að stundum er svo mikið sandfok að ekki er óhætt að opna viðkvæma hluti tækja. Við höfum náð að fylla um 70.000 m3 núna í maí. Við notum stórvirk tæki við framkvæmdina eins og sjá má á meðfylgjandi myndum. Brúarvinna hefst í haust þegar sigtími er liðinn.

Verkkaupi: Vegagerðin

Páll Sigurjónsson stofnandi og fv. framkvæmdastjóri Ístaks látinn

Thu, 25 May 2023 10:20:00 GMT

Páll Sigurjónsson frá Ofanleiti, byggingaverkfræðingur fæddist þar 5. ágúst 1931.

Páll varð stúdent frá Menntaskólanum í Reykjavík árið 1952. Hann lauk fyrri hlutaprófi í verkfræði í Háskóla íslands 1955, lauk svo prófi í byggingaverkfræði í DTH í Kaupmannahöfn 1959. Sat tveggja vetra námskeið hjá danska verkfræðingafélaginu um atvinnulífið, m.a. lögfræði og hagfræði á árunum 1966-1968.

Páll var verkfræðingur hjá Verkfræðistofu Sigurðar Thoroddsen 1959-1960, hjá flugher Bandaríkjanna á Keflavíkurflugvelli 1960-1961. Hann starfaði síðan hjá E. Phil & Søn A/S í Færeyjum 1961-1964 og í Kaupmannahöfn 1964-1968. Hann var yfirverkfræðingur hjá Fosskraft sf. við Búrfellsvirkjun 1968-1970 og var einn af stofnendum og framkvæmdastjóri Ístaks hf. frá árinu 1970 til ársins 2003. Páll tók síðar við sem stjórnarformaður Ístaks og lét af þeim störfum árið 2006.

Páll var sæmdur riddarakrossi hinnar íslensku fálkaorðu árið 1987, var handhafi riddarakross hinnar konunglegu sænsku Norðurstjörnu og var sæmdur heiðursmerki Verkfræðingafélags Íslands 1993.

Páll Sigurjónsson lést þriðjudaginn 23. maí á 92. aldursári.

Hann lætur eftir sig fjögur börn, 13 barnabörn og sex barnabarnabörn. Eftirlifandi eiginkona Páls er Sigríður Gísladóttir.

Páll skrifaði stóran part í sögu Ístaks með stofnun félagsins árið 1970 og stýrði félaginu í yfir 30 ár.

Við hjá Ístak vottum fjölskyldu Páls okkar innilegu samúðarkveðjur.

Framkvæmdir við hringveginn um Kjalarnes á tíma

Fri, 12 May 2023 13:30:00 GMT

Framkvæmdir við hringveginn um Kjalarnes hafa nú staðið yfir í um þrjú ár. Fyrsti áfangi verksins verður opnaður í næsta mánuði. Heildarverkefnið snýr að því að breikka hringveginn frá Kollafirði að Hvalfjarðarvegi, en fyrsti áfanginn nær frá Kollafirði að Grundarhverfi.

Á kaflanum sem opna á í byrjun júní hefur verið unnið að því að breikka hringveginn í 2+2-veg frá Varmhólum við Kollafjörð langleiðina að Grundarhverfi, með hringtorgi við Móa, undirgöngum við Varmhóla og Saltvík auk hliðarvega, ásamt reiðstígum og stígum fyrir gangandi og hjólandi vegfarendur. Að öllum líkindum verður einhver frágagnsvinna og vinna við hliðarvegi eftir þó vegurinn opni í júní, en þær framkvæmdir klárast þó í sumar.

Samkvæmt samningi eru verklok þann 31.maí 2023 en verkinu seinkar aðeins inn í sumarið vegna mikils aukins umfangs verksins í gegnum verktímann.

Vígsla stúdentagarða FS á Sögu

Thu, 11 May 2023 09:16:00 GMT

Miðvikudaginn 10. maí fór fram formleg vígsla stúdentagarða Félagsstofnun stúdenta á Sögu, u.þ.b. ári eftir að uppbygging þeirra hófst. Afhentar hafa verið 106 íbúðir af 111 en fimm íbúðir í tengibyggingu verða afhentar á næstu dögum.

Af þessu tilefni bauð Félagsstofnun stúdenta til veislu í gamla pósthúsinu á Sögu og bauðst gestum að skoða sýningaríbúð og sameiginlegt rými á 6. hæð í kjölfarið. Það var ekki annað að heyra en að mikil ánægja ríkti um útkomuna, fyrir það erum við þakklát. Í máli Guðrúnar Björnsdóttur framkvæmdarstjóra FS kom hún inn á að á síðastliðnum 6 árum hafa FS og Ístak byggt saman samtals 424 leigueiningar fyrir stúdenta.

Þrátt fyrir þennan áfanga þá er nóg framundan á Sögu, bæði viðgerðir á ytra byrði hússins sem og breytingar á lyftum, stigahúsi, Grillinu til að nefna nokkur atriði.

Hjálmur með erindi á Brúarráðstefnu Vegagerðarinnar

Fri, 05 May 2023 10:53:00 GMT

Mikill áhugi var fyrir brúarráðstefnu Vegagerðarinnar, Byggjum brýr sem haldin var fimmtudaginn 26. apríl síðastliðinn. Um 130 manns sóttu ráðstefnuna sem haldin var á Hótel Reykjavík Grand. Ístak átti erindi á ráðstefnunni. Hjálmur Sigurðsson framkvæmdastjóri mannvirkja, fjallaði um áskoranir verktaka í brúargerð. Hann tók sem dæmi þær hremmingar sem Ístak hefur lent í við byggingu brúar yfir Stóru-Laxá en tafir á aðföngum vegna Covid, mikil kuldatíð og krapaflóð í ánni gerði mönnum erfitt fyrir. Þannig þurfti að rjúfa veginn að brúnni í talsverðan tíma auk þess sem ákveðið var að byggja yfir alla brúna til að geta klárað steypuvinnu.

Farið var yfirólíka þætti sem snúa að brúarsmíðum, veðurfar, undirlendi, bygging þeirra og margt fleira. Einbreiðar brýr voru nokkuð til umræðu, eða þörfin fyrir að fækka þeim.

Nánari upplýsingar um ráðstefnuna og glærur frá fyrirlesurum má finna hér .

Edda - Hús íslenskra fræða

Mon, 24 Apr 2023 12:59:00 GMT

„Holan er horfin húsið er risið“ sagði forseti Íslands, Guðni Th. Jóhannesson forseti Íslands í opnunarávarpi við formlega athöfn þar sem Hús íslenskunnar, hlaut nýtt nafn í dag, það sér íslenska nafn Edda .

Fyrsta skóflustungan að byggingunni var tekin 11. mars 2013 en hlé var á framkvæmdum í nokkur ár. Bygging hússins hófst 30. ágúst 2019 þegar Lilja Dögg Alfreðsdóttir menntamálaráðherra og Guðrún Ingvarsdóttir forstjóri FSRE undirrituðu verksamning við Ístak. Framkvæmdirnar gengu samkvæmt áætlun framan af en í kjölfar heimsfaraldurs og hráefnisþurrðar vegna innrásar í Úkraínu varð nokkur töf. Sem gerði það að verkum að húsinu er skilað örfáum mánuðum á eftir áætlun.

Heildarkostnaður við bygginguna er um 98,9% af áætlun frá 2019 á verðlagi dagsins í dag. Stefnt var að því að flutt yrði í húsið í haust, svo þessi áfangi næst á undan áætlun.

Á verktímanum var lögð rík áhersla á samfélagslega ábyrgð. Sérstök áhersla var á umhverfis-, öryggis- og réttindamál. Niðurstaða þeirrar vinnu er meðal annars að húsið fær umhverfisvottun frá BREEAM stofnuninni og sú gleðilega staðreynd að engin vinnuslys urðu á verktímanum.

Ístak er stoltur byggingaraðili af þessu nýja heimili íslenskrar tungu og við óskum Árnastofnun, Háskóla Íslands og þjóðinni til hamingju með þessa glæsilegu byggingu.

Viðvörun

Wed, 12 Apr 2023 11:04:00 GMT

Ístak hefur fengið ábendingar um að óprúttinn aðili hafi verið að senda út pósta og fjárfesta í vörum undir nafni Ístaks.

Við viljum leggja áherslu við viðskiptafyrirtæki okkar að vera vakandi þegar tekið er út vörur í nafni fyrirtækisins. Ef einhver vafi vaknar upp, hvetjum við fyrirtæki til að hafa samband og staðfesta starfsmann í síma 530-2700 eða á istak@istak.is.

Nýr þjónustusamningur við MachineMax

Tue, 04 Apr 2023 10:41:00 GMT

Í síðustu viku undirritaði Ístak þjónustusamning við breska hugbúnaðarfyrirtækið MachineMax.

Hugbúnaðurinn mun hjálpa okkur að halda utan um reksturinn á vélum og búnaði fyrirtæksins. Innleiðing á hugbúnaðinum mun hefjast á næstu vikum.

Með innleiðingunni ætlum við að tryggja betri yfirsýn á þessum eignum, betri nýtingu og minnka skáningavinnu á verkum og bókhaldi.

Nýtt verk hjá IKEA

Thu, 26 Jan 2023 08:09:00 GMT

IKEA er að stækka núverandi húsnæði sitt að Kauptúni 4 og með því að færa alla starfsemi sína og lagerhald á einn stað. Um er að ræða nýtt vöruhús ásamt nýja skrifstofu, starfsmannaaðstöðu og betri aðstaða fyrir viðskiptavini sem nýta sér “Smella og sækja” þjónustuna. Samtals verður stækkunin um 12.500m².

Þetta verk er fyrri hluti þessa verkefnis sem innifelur í sér:

• Jarðvinnuframkvæmdir – tilbúið undir undirstöður

• Lagnaskurðir

• Uppsteypa og frágangur á nýrri 325m² tæknibyggingu

• Girða af og merkja vinnusvæðið

Staðan í dag er sú að uppsteypa á tæknibyggingunni er nánast lokið og jarðvinnan gengur vel. Framundan er frágangur innan og utanhúss á tæknibyggingunni og líka að klára graftarvinnu fyrir undirstöður fyrir vöruhúsið.

Staðarstjóri á verkinu er Kári Kolbeinn Eiríksson og verklok áætluð í byrjun apríl 2023.

BIM Dagur Ístaks

Fri, 14 Oct 2022 14:49:00 GMT

Í síðustu viku fór BIM dagur Ístaks fram í þéttsetnum sal Verkfræðinnar í Reykjavík. Á viðburðinum komu fram aðilar bæði frá BIM deild Ístaks og Per Aarsleff, systurfyrirtæki Ístaks. Þau héldu kynningu á stafrænni þróun og notkun BIM líkana í framkvæmdum, með áherslu á virðissköpun og hagræðingu.

Tilgangurinn með viðburðinum var að kynna fyrir samstarfsaðilum Ístaks hversu gagnleg stafræn þróun og BIM líkön eru í verklegum framkvæmdum og deila okkar reynslu í notkun og innleiðingu á þeim.

Við þökkum ykkar sem mættu kærlega fyrir þátttökuna og vonumst til að sjá ykkur aftur að ári!

Ístak er Fyrirmyndarfyrirtæki í rekstri árið 2022!

Wed, 21 Sep 2022 09:07:00 GMT

ÍSTAK er á meðal 2% íslenskra fyrirtækja sem uppfylla skilyrði Viðskiptablaðsins og Keldunnar og telst því Fyrirmyndarfyrirtæki í rekstri árið 2022. ÍSTAK hefur verið á listanum siðan 2019.

Fyrirtæki þurfa að uppfylla ströng skilyrði um afkomu, eiginfjárhlutfall, tekjur og eignir og er það okkur heiður að vera á lista Viðskiptablaðsins og Keldunnar í ár.

Við erum stolt af þessari viðurkenningu og við þökkum viðskiptavinum og okkar frábæra starfsfólki þennan árangur.

Ístak skrifar undir tvo nýja verksamninga við Félagsstofnun Stúdenta

Mon, 05 Sep 2022 13:41:00 GMT

Síðast liðinn fimmtudag, þann 1. september voru undirritaðir tveir nýjir verksamningar við Félagsstofnun Stúdenta.

Þar er um að ræða nýbyggingu að Lindargötu 44 þar sem byggðar verða 10 nýjar stúdentaíbúðir í þriggja hæða húsi, sirka 570 m2.

Þetta verk er hafið og á að ljúka þann 31. júlí 2023. Húsið er byggt úr forsteyptum einingum sem verið er að steypa í steypuskála Ístaks.

Jarðvinnu verkstjóri er Barði Kristjánsson og verkstjóri í uppsteypu á sökklum og kjallara er Slawomir Droby. Staðarstjóri er Ingimundur Þorsteinsson.

Síðan er það stækkun á leikskóla við Eggertsgötu 12-14, Leikgarði.

Verkið hefst fljótlega. Verkinu á að ljúka ca 1. sepember 2023. um er að ræða 770 m2 viðbyggingu.

Ingimundur Þorsteinsson verður staðarstjóri.

Á meðfylgjandi mynd sjást þau Guðrún Björnsdóttir framkvæmdastjóri FS og Karl Andreassen forstjóri Ístaks handsala samninginn.

Við erum framúrskarandi fyrirtæki...aftur!

Thu, 01 Sep 2022 13:55:00 GMT

Ístak hf. var aftur útnefnt eitt af Framúrskarandi fyrirtækjum ársins 2022. Ístak leggur gjarnan áherslu á að vera stöðugt fyrirtæki sem byggir rekstur sinni á sterkum stoðum og stuðla að bættu viðskiptaumhverfi. Einungis 2% fyrirtækja á Íslandi komast á lista CreditInfo yfir framúrskarandi fyrirtæki og því erum við afar stolt að hafa náð þessum áfanga.

Ár hvert vinnur Creditinfo greiningu á rekstri íslenskra fyrirtækja og veitir framúrskarandi fyrirtækjum viðurkenningu fyrir árangurinn. Ístak var einnig handhafi viðurkenningarinnar árið 2020 og árið 2021. Þetta er frábær árangur hjá Ístaki og mikil viðurkenning á vönduðum rekstri fyrirtækisins.

Verk á Keflavíkurflugvelli

Fri, 05 Aug 2022 09:59:00 GMT

Ístak er með í gangi fjölmörg verkefni fyrir Isavia á Keflavíkurflugvelli þeirra á meðal er gerð nýrrar flugvélarakbrautar TWY MIKE. Framkvæmdir á flugvellarsvæði hefur mikil áhrif á flugumferð og á meðan verkefni stendur verður hluta flugvallar lokar bæði flugbrautir og akbrautir, farþegar verða mest var við framkvæmdir þar sem aksturstími á akbrautum getur lengst verulega, Til að þetta sé hægt er dagleg vinna skipulögð með flugturni nú yfir mesta álagstímann.

Verkið hefur gengið vel í sumar eftir erfiðan vetur, rúmlega 40 starfsmenn eru á verkstað hverju sinni, búið er að vinna um 60% af verki, gert er ráð fyrir að verki ljúki í lok árs og ný akbraut verði kominn í notkun í vor.

Kolefnisföngun á Hellisheiði

Thu, 04 Aug 2022 13:04:00 GMT

Við hjá Ístaki erum stolt að vera alverktaki á lofthreinsiveri og viðhaldshúsi fyrir Climeworks sem heitir Mammoth. Við berum ábyrgð á hönnun og framkvæmdum mannvirkjanna sem saman stendur af jarð-, steypu-, uppsetningu stálburðarvirkis og klæðningu húsanna ásamt innanhúsfrágangi.

Mammoth er annað lofthreinsiver Climeworks sem staðsett er á Íslandi. Það er hannað með getu til að fanga um 36.000 tonn af koltvísýringi á hverju ári þegar það er í fullum rekstri. Carbfix er samstarfsaðili Climworks í Mammoth verkefninu sem mun sjá um varanlega geymslu á koltvísýringi neðanjarðar. Hellisheiðarvirkjun sem rekin er af Orku Náttúrunnar mun útvega Mammoth og Carbfix endurnýjanlega orku til að starfrækja allt lofthreinsi- og geymsluferlið. Gert er ráð fyrir því að framkvæmdir standi í 18-24 mánuði áður en starfsemi getur hafist. Við erum spennt fyrir samstarfinu með Climeworks og að sjá þetta mikilvæga verkefni verða að veruleika.

Hús Íslenskra Fræða – allt á réttri leið

Thu, 21 Jul 2022 15:27:00 GMT

Hús íslenskunnar stendur við Arngrímsgötu á Melunum í Reykjavík og mun m.a. hýsa fjölbreytta starfsemi stofnunar Árna Magnússonar í íslenskum fræðum og íslensku- og menningardeild Háskóla Íslands. Húsið er sporöskjulaga og tæknilega flókin bygging sem meðal annars mun hýsa sérhannaða handritageymslu. Árnastofnun deilir byggingunni með Háskóla Íslands og þegar hún verður tilbúin flytjast kennsla og rannsóknir í íslenskum fræðum þangað. Byggingin verður um 6.500 fermetrar auk um 2.200 fermetra opinnar bílageymslu. Byggingin verður mikil búbót fyrir Árnastofnun og verður m.a. búin sýningarsölum þar sem fólk alls staðar utan úr heimi hefur mikinn áhuga á handritunum, sem eru á heimsminjaskrá UNESCO.

Hús íslenskra fræða mun verða metið eftir BREEAM vistvottunarkerfinu. Með það markmið að byggingin og innviðir hafi sem minnst umhverfisáhrif á líftíma sínum, séu heilsusamlegir fyrir notendur og að viðhaldsþörf verði sem minnst.

Staðan í dag er sú að búið er að steypa botnplötu tjarnar, unnið er að fyllingu að tjarnarkanti og steypa undir forsteyptar einingar í göngubrú í tjörn. Klæðningar utanhúss eru að klárast, hellulögn, kantsteinar, snjóbræðsla og vinna við þakkanta er í fullum gangi. Uppsetning á svalahandriðum hefst svo bráðlega.

Verið er að innrétta á flestöllum hæðum, málningarvinnan er einnig í gangi, gólfvinna er að klárast á annarri og þriðju hæð. Uppsetning á innréttingum, glerskilrúmum, timburklæðningu og hurðum er á góðri leið. Einnig er verið að vinna í lögnum og rafmagni á öllum hæðum.

Staðarstjóri er Ingimundur Þorsteinsson.

Hér fyrir neðan má sjá nýjustu myndir frá verkinu.

Brú á Stóru-Laxá

Thu, 21 Jul 2022 10:30:00 GMT

Framkvæmdir á brú við Stóru-Laxá hófust árið 2021. Verkið felst í byggingu brúar yfir Stóru-Laxá, gerð nýs vegkafla Skeiða- og Hrunamannavegar beggja vegna, breikkun vegamóta við Skarðsveg og við Auðholtsvegs og gerð reiðstigs. Þessi brú verður til hliðar við núverandi brú, hún verður tvíbreið, staðsteypt, eftirspennt bitabrú. Brúin verður 145m löng í fjórum höfum.

Núverandi staða á verkinu er góð og eftir erfiðan vetur er nú allt á fullu í brúargerð, síðasti stöpull verður steyptur þann 27.7.22. Vinna við undirslátt brúardekks hefst í vikunni. Notuð verða sérstök brúarmót sem keypt voru til landsins vegna brúarverka sem Ístak er með.

Ístak skrifar undir samning um byggingu á hjúkrunarheimili við Boðaþing

Mon, 04 Jul 2022 09:52:00 GMT

Kópavogsbær og Framkvæmdasýslan buðu út verkið Hjúkrunarheimili við Boðaþing og Ístak í samstarfi við Eflu og THG urðu hlutskörpust í þeirri samkeppni. Verkið er unnið sem alverk. Ístak er alverktakinn.

Hjúkrunarheimilið Boðaþingi 11-13 er á þremur hæðum með 64 hjúkrunarrýmum og er tengt við núverandi þjónustumiðstöð með tengigöngum á 2. og 3.hæð. Heildarstærð hússins er um 4300 m².

Húsið verður staðsteypt og einangrað að utan.

Gert er áð fyrir að skrifað verði undir samninga núna í vikunni en búið er að veita verkið til Ístaks og áætlað er að framkvæmdir hefjist í lok ágúst og þeim lokið í september 2024.

Undirritun samnings við Miðbæjareigna og Kjalar Fjárfestingarfélags

Fri, 03 Jun 2022 13:12:00 GMT

Í gær var undirritaður samningur milli Ístaks hf. og MBE eða Miðbæjareigna og Kjalar Fjárfestingarfélags um byggingu fjölbýlishúss fyrir aldraða. Húsið verður við Njarðarvelli 6 í Reykjanesbæ. Byggingin verður 54 íbúðir á fjórum hæðum auk bílakjallara með geymslurýmum. Íbúðir skilast fullbúnar.

Verkið hefst fljótlega en búið er að grafa grunn og fylla undir botnplötu kjallara. Áætluð verklok eru fyrri hluta árs 2024.

Undirritun samninga við Félagsstofnun stúdenta vegna Hótel Sögu

Fri, 03 Jun 2022 12:37:00 GMT

Í gær skrifuðu Ístak og Félagsstofnun stúdenta undir tvo samninga. Undirritaður var samningur um utanhússviðgerðir þar sem allt ytra byrði hússins verður lagfært. Skipt um klæðningu á þaki, gluggaskipti á hluta hússins, glerskipti og gluggaviðgerðir, múrviðgerðir, málun o.fl. Áætluð verklok á því verkefni eru í september 2023. Hinn samningurinn var um uppbyggingu á 113 stúdíóíbúðum í norðurálmu hússins. Íbúðirnar verða teknar í notkun fyrri hluta næsta árs.

Í dag eru um 45 manns starfandi á vegum Ístaks í húsinu ef með eru taldir starfsmenn undirverktaka. Reikna má með að þeim fjölgi enn frekar á næstu vikum.

Forvarnarverðlaun VÍS 2022

Wed, 30 Mar 2022 15:14:00 GMT

ÍSTAK hefur verið tilnefnt til forvarnarverðlauna VÍS 2022. ÍSTAK leggur gríðarlega áherslu á öryggi starfsmanna með því að bjóða uppá ítarlega þjálfun og auka vitund starfsmanna um helstu áhætturnar í störfum þeirra.

Gjafaleikur - Verk og vit 2022

Wed, 30 Mar 2022 15:11:00 GMT

Ístak var með bás á stórsýningunni Verk og vit um liðna helgi. Við fengum fjölda góðra gesta í básinn okkar þar sem við meðal annars kynntum hvernig við notum BIM-tæknina í byggingaframkvæmdum. Meðal þeirra sem heimsóttu okkur í básinn var Ingólfur Hannesson sem tók jafnframt þátt í leik með því að fylgja okkur á LinkedIn. Dregið var úr pottinum að sýningu lokinni og fékk Ingólfur þessi flottu Oculus Quest 2 þrívíddargleraugu í verðlaun. Ingólfur er nemi við Háskóla Íslands á lokaárinu sínu í byggingarverkfræði. Við óskum Ingólfi innilega til hamingju.

Ert þú að fylgja Ístak á LinkedIn ? Þar deilum við fréttum af starfsemi Ístak og auglýsum m.a. laus störf.

Verk og vit 2022

Wed, 30 Mar 2022 15:00:00 GMT

Stórsýningin Verk og vit for fram núna um helgina í Laugardalshöllinni. Fjöldi manns heimsóttu bás Ístaks á sýningunni. Auk ráðherra og forystufólks iðnaðar- og atvinnulífs fengum við fjölda fyrrverandi og núverandi starfsmanna í heimsókn auk annarra sýningargesta. Við hlið bássins komum við upp fyrirlestraaðstöðu og héldum þar kynningar á sögu Ístaks og BIM fyrir vel á annað hundrað nemenda, bæði í húsasmíði, húsgagnasmíði, múrverki og byggingatæknifræði.

Hér að neðan eru nokkrar ljósmyndir frá sýningunni.

Ný vefsíða Ístaks

Thu, 02 Dec 2021 13:17:00 GMT

Ístak tekur í dag í notkun nýja vefsíðu fyrirtækisins og leysir hún gamla síðu af hólmi sem þjónað hefur frá árinu 2015. Nýja síðan er hönnuð af íslensku hönnunar- og vefstofunni VISKU og er hún bæði notendavæn og aðgengileg í öllum snjalltækjum sem og í hefðbundum tölvum, ólíkt því sem var á gömlu síðunni.

Vefsíðan er smíðuð með nýjustu tækni í viðmótsforritun. Hún er forrituð í React sem er forritunarmál sem upprunalega var búið til af Facebook til að mæta ströngustu kröfum notenda. Ofan á React notar síðan NextJs sem gerir síðunni kleift að vera statísk (e. static) en það merkir að allar síður eru búnar til fyrirfram sem skilar sér í afar hröðum vef.

Markmiðið með nýju síðunni er að einfalda aðgengi að upplýsingum og varpa ljósi á þá fjölbreyttu þjónustu sem fyrirtækið býður upp á. Á síðunni er að finna upplýsingar um alla starfsemi Ístaks og hinar ólíku þjónustudeildir sem starfræktar eru innan fyrirtækisins. Þar eru einnig aðgengilegar upplýsingar um störf í boði auk þess sem sögu fyrirtækisins er gerð góð skil í máli og myndum en Ístak fagnaði einmitt 50 ára starfsafmæli á síðasta ári.

Nýr samningur um frekari uppbyggingu Isavia í Keflavík

Wed, 24 Nov 2021 10:42:00 GMT

Ístak og Isavia undirrituðu á föstudag samning um gerð nýrrar 1.200 metra akbrautar fyrir flugvélar á Keflavíkurflugvelli og næsta áfanga nýrrar austurálmu Flugstöðvar Leifs Eiríkssonar. Ístak átti hagkvæmustu tilboðin en verkin voru boðin út á Evrópska efnahagssvæðinu. Heildarkostnaður við bæði verkin er áætlaður um 24,6 milljarðar.

Í fréttatilkynningu Isavia kemur fram að nýja akbrautin tengir flugbraut við hlað flugstöðvarinnar og er henni ætlað að stuðla að bættri nýtingu óháð ytri skilyrðum og greiða fyrir umferð flugvéla eftir lendingu. Hluti af verkinu er uppsetning ljósabúnaðar. Áætlað er að verkinu ljúki fyrir lok næsta árs. Tilboð Ístaks í verkið nam rúmlega 940 milljónum króna.

„Þetta eru spennandi verkefni,“ segir Karl Andreassen, framkvæmdastjóri Ístaks. „Við höfum öðlast mikla og dýrmæta reynslu við að vinna að uppbyggingarverkefnum hér á Keflavíkurflugvelli, nú síðast við fyrstu áfanga austurálmu flugstöðvarinnar, sem við höldum nú áfram með. Svo hefjumst við handa úti á vallarsvæðinu. Um 80-100 manns munu vinna að þessum tveimur verkefnum. Við notum að hluta efni sem fallið hefur til við aðrar framkvæmdir á svæðinu. Það sparar peninga og dregur úr umhverfisáhrifum.“

Lokið er jarðvinnu fyrir nýja austurálmu Flugstöðvar Leifs Eiríkssonar, sem Ístak annaðist. Fyrirtækið átti hagstæðasta tilboð í burðarvirki og veðurkápu hússins, tæpa 4,5 milljarða króna. Byggingin er þrjár hæðir og 21 þúsund fermetrar. Burðarvirkið skiptist í djúpan steyptan kjallara sem hýsir færibandasal. Á fyrstu hæð verður stækkun á töskusal fyrir ný færibönd. Verslunar- og veitingasvæði ásamt biðsvæðum farþega stækka um 4000 fermetra. Miðað er við að þessum áfanga ljúki næsta vor.

„Þetta er mikilvægur áfangi í þróun Keflavíkurflugvallar. Þessi nýja akbraut greiðir mjög fyrir umferð flugvéla. Tíminn frá lendingu að flughlaði styttist sem dregur úr umhverfisáhrifum vegna útblásturs. Þá mun öryggi umferðar á vellinum aukast enn með þessari upplýstu akbraut. Svo er gott að sjá að vinna við austurálmuna er á áætlun. Hún verður að sama skapi gríðarlega mikilvæg viðbót við flugstöðina,“ segir Sveinbjörn Indriðason, forstjóri Isavia.

Við erum framúrskarandi fyrirtæki

Tue, 26 Oct 2021 10:40:00 GMT

Ístak var á dögunum útnefnt eitt af Framúrskarandi fyrirtækjum ársins 2021. Elfa Björg Aradóttir, fjármálastjóri, og Gísli H. Guðmundsson, deildarstjóri bygginga, tóku við viðurkenningunni við hátíðlega athöfn s.l. fimmtudag fyrir hönd Ístaks.

Ár hvert vinnur Creditinfo greiningu á rekstri íslenskra fyrirtækja og veitir framúrskarandi fyrirtækjum viðurkenningu fyrir árangurinn. Ístak er í hópi 2% íslenskra fyrirtækja sem uppfylla ströng skilyrði Creditinfo um árangur í rekstri en þetta er ellefta árið í röð sem Creditinfo tekur saman þennan lista. Ístak var einnig handhafi viðurkenningarinnar árið 2020. Þetta er frábær árangur hjá Ístaki og mikil viðurkenning á vönduðum rekstri fyrirtækisins.

Góður gangur í Bryggjuhverfinu

Thu, 21 Oct 2021 08:32:00 GMT

Rífandi gangur er í framkvæmdum Ístaks í Bryggjuhverfinu þar sem fyrirtækið reisir sjö íbúðabyggingar með 124 íbúðum fyrir Búseta og íbúðafélagið Bjarg. Fyrir helgi afhenti Ístak hús númer tvö sem er eitt af sex húsum Bjargs og verður það tilbúið til innflutnings á næstu dögum. Áður hafði Búseti fengið sína byggingu afhenta og eru íbúar þegar fluttir inn. Framkvæmdir hófust í júní í fyrra.

Afhending fyrstu tveggja húsanna stóðst áætlun og segir Hafsteinn Guðmundsson, staðarstjóri, menn vera mjög glaða í hjartanu yfir því að það tókst. Þeir þurfi þó að halda vel á spilunum til að afhenda þriðju bygginguna á réttum tíma um miðjan næsta mánuð. Byggingarnar sem þá verða eftir eiga að vera tilbúnar til afhendingar á tímabilinu 15. mars- 15. júní.

Íbúðabyggingarnar standa við tvær nýjar götur í Bryggjuhverfinu, sem eru þvergötur á Tangabryggju, og nefnast Beimabryggja og Gjúkabryggja. Ýmsir hafa velt fyrir sér uppruna og merkingu þessara nafna en þau eru sótt í fornnorrænu. Beimur merkir maður, hermaður eða hús en Gjúki er karlmannsnafn sem merkir líklega “hinn gjafmildi” samkvæmt Stofnun Árna Magnússonar.

Mikil ánægja með nýtt íþróttahús á Selfossi

Fri, 15 Oct 2021 15:02:00 GMT

Starfsemi er komin í fullan gang í nýju og fjölnota íþróttahúsi í sveitarfélaginu Árborg en Ístak leggur nú lokahönd á frágang utanhúss. Björn Þórðarson, staðarstjóri Ístaks, segir mikla ánægju ríkja meðal íbúa enda markar húsið þátttaskil í íþróttalífi bæjarins nú þegar bæði knattspyrna og frjálsar íþróttir fá þak yfir höfuðið. Hópar eldri borgara eru nær daglegir gestir og mæta snemma á morgnana til æfinga auk þess sem afreksíþróttabraut Fjölbrautarskóla Suðurlands nýtir nýju aðstöðuna vel.

Ístak hóf framkvæmdir í desember 2019 og voru verklok áætluð í haustbyrjun en örlitlar tafir hafa orðið m.a. vegna Covid-19. Húsið er staðsett á íþróttasvæði UMFS og hýsir hálfan knattspyrnuvöll ásamt aðstöðu til frjálsra íþrótta með 60m tartanhlaupabraut. Áætlaður mannfjöldi í húsið er 350 manns við æfingar að jafnaði og allt að 1.500-3.000 manns á sérstökum viðburðum. Hönnun hússins byggir á frumhönnun Verkís hf. Og Alark arkitekta og er unnið samkvæmt BIM aðferðafræðinni.

Unnið er að frágangi á klæðningu hússins og steinhleðslum sem mikill metnaður er lagður í og eru sérfræðingar í steinhleðslu að störfum við verkið. Sveitarfélagið Árborg er eigandi hússins og nú er leitað eftir tillögum að nöfnum á það. Björn staðarstjóri er ekki í vafa um hvað húsið á heita – Ístakshöllin!

Glæsileg viðbygging við Gamla Garð komin í gagnið

Thu, 14 Oct 2021 09:55:00 GMT

Félagsstofnun stúdenta tók í gær formlega í notkun glæsilega viðbyggingu við Gamla Garð en Ístak afhenti verkkaupa bygginguna samkvæmt áætlun um nýliðin mánaðamót.

Alls eru 69 herbergi í viðbyggingunni og hvert þeirra með sér baðherbergi. Sameiginleg eldhús eru sex talsins ásamt setustofum, samkomurými, ýmiss konar geymslum og þvottaaðstöðu. Andrúm arkitektar hönnuðu viðbygginguna en við hönnun var lögð áhersla á að framkvæmdin félli vel að nærliggjandi byggingum Háskóla Íslands, einkum Gamla Garði, Þjóðminjasafni og götumynd við Hringbraut.

Kári Kolbeinn Eiríksson, staðarstjóri, segir verkið hafa gengið ótrúlega vel. Mildur vetur hafði sitt að segja ásamt því að minni umsvif hafi verið á háskólasvæðinu vegna Covid-19. Því var auðveldara að athafna sig á verkstað þótt vissulega hafi Covid tafið á öðrum sviðum. Samstarfið við verkkaupa var gott og sömuleiðis undirverktaka en þeir helstu voru Rafholt, Alhliða pípulagnir og Ísloft.

Félagsstofnun stúdenta á og rekur Gamla Garð en húsnæðið er ætlað íslenskum og erlendum háskólanemum sem þurfa tímabundinn íverustað yfir vetratímann, s.s. vegna skiptináms. Á sumrin er Gamli Garður starfræktur sem gistiheimili og leigður út sem slíkur.

Gamli Garður var reistur á þriðja áratug síðustu aldar og hefur nær allan þann tíma verið rekinn sem stúdentagarðar. Þar voru fyrir rými fyrir ríflega 40 nema. Nýju viðbæturnar við Gamla Garð samanstanda af tveimur þriggja hæð viðbyggingum ásamt tengigangi við gömlu bygginguna og kjallara. Samtals er nú rými fyrir um 110 íbúa á Gamla Garði.

Þessa dagana vinna starfsmenn Ístaks að ýmsum lokafrágangi í sameiginlegum rýmum innanhúss ásamt hellulögnum og lóðarfrágangi utandyra og má ætla að sú vinna standi fram eftir októbermánuði.

Ístak byggir fyrir Algaennovation á Hellisheiði

Mon, 07 Dec 2020 14:46:00 GMT

Í október 2018 gekk Ístak frá marksamningi við Algaennovation, sem er ísraelskt fyrirtæki, um byggingu á lítilli verksmiðju í nýjum jarðhitagarði ON á Hellisheiði. Verksmiðjan mun framleiða smáþörunga (micro algae) með nýrri tækni og nýta sér heitt vatn og rafmagn frá Hellisheiðarvirkjun. Verksmiðjan er aðeins tæpir 600 m2, en ráðgert er að hún verði stækkuð umtalsvert ef vel tekst til með fyrsta áfangann.

Byggingin er stálgrindahús með steyptri botnplötu sem grunduð er á staurum þar sem djúpt var á fast. Arkitektar eru TARK ehf og verkfræðingar Mannvit ehf. Framkvæmdir hófust í lok árs 2018 við jarðvinnu og niðurrekstur staura. Undirstöður og botnplata voru steypt nú í vetur, þrátt fyrir ýmsa erfiðleika vegna vetrarveðurs á heiðinni. Stálvirki eru nú tekin að rísa og er ráðgert að búið verði að loka húsinu innan skamms og að verksmiðjan verði tilbúin í sumar.

Samið um breikkun Reykjanesbrautar

Mon, 07 Dec 2020 14:43:00 GMT

Vegagerðin og Ístak hafa gengið til verksamninga um breikkun Reykjanesbrautar og voru samningar þess efnis undirritaðir í dag. Samningurinn hljóðar upp á liðlega tvo milljarða króna og er þetta stærsta útboðsverk Vegagerðarinnar í ár. Áætluð verklok eru 1. nóvember 2020.

Vegarkaflinn sem um ræðir er 3.2 km langur og liggur á milli Krísuvíkurgatnamóta og kirkjugarðsins í Hafnarfirði. Hluti af verkinu er breikkun brúar yfir Strandgötu og gerð tveggja göngubrúa yfir Reykjanesbraut ásamt gerð umtalsverðra hljóðvarna. Þetta er því bæði stórt og fjölbreytt verkefni sem þegar er komið í gang með uppsetningu vinnubúða og öðrum undirbúningi.

Ístak byggir hús íslenskunnar

Thu, 08 Oct 2020 18:10:00 GMT

Í dag var undirritaður samningur um byggingu Húss íslenskunnar. Undirritunin fór fram á verkstað og voru það þau Lilja Alfreðsdóttir mennta- og menningarmálaráðherra, Guðrún Ingvarsdóttir, forstjóri Framkvæmdasýslu ríkisins, og Karl Andreassen, framkvæmdastjóri ÍSTAKS, sem undirrituðu samninginn. ÍSTAK hefur nú þegar hafið vinnu á svæðinu og undanfarnar vikur hefur vinna við grunninn verið í fullum gangi.

Hús íslenskunnar mun hýsa fjölbreytta starfsemi Stofnunar Árna Magnússonar í íslenskum fræðum og Íslensku- og menningardeild Háskóla Íslands.. Húsið verður á þremur hæðum auk kjallara undir hluta hússins og opins bílakjallara.

Framkvæmdasýsla ríkisins hefur umsjón með byggingu hússins, ÍSTAK er aðalverktaki þess og verkfræðistofan Efla hefur með höndum framkvæmdaeftirlit og byggingastjórn. Aðalhönnuðir byggingarinnar eru Hornsteinar arkitektar ehf.

Verksmiðjuhús Algaennovation á Hellisheiði vígt

Thu, 08 Oct 2020 18:01:00 GMT

Nýtt verksmiðjuhús Algaennovation á Hellisheiði var vígt í gær, 24. september, að viðstöddu fjölmenni. Ístak sá um byggingu hússins.

Ohad Bahan, stjórnarformaður Algaennovation, flutti ræðu ásamt Bjarna Benediktssyni fjármálaráðherra, Elliða Vignissyni bæjarstjóri Ölfuss og fleirum.

Verksmiðjan er einstaklega vistvæn og skilur ekki eftir sig kolefnisspor. Þar eru framleiddir örþörungar (Micro-Algae production) og eru þeir seldir til fiskeldis við Miðjarðarhafið - að minnsta kosti fyrst um sinn.

Ístak byggir skóla í Nuuk

Sat, 18 Jul 2020 09:36:00 GMT

Í gær var undirritaður samningur á milli ÍSTAKS og NCD í Nuuk um byggingu nýs skóla í Nuuk á Grænlandi.

Við erum sérstaklega stolt og ánægð yfir því að hafa landað þessu verkefni en við val á verktaka var tekið tillit til verðs, útfærslu og rekstrarkostnaðar. Samningurinn hljóðar upp á 615 MDKK og er því eitt af stærstu verkefnum sem Ístak hefur tekið að sér. Einnig er þetta stærsti verksamningur sem bæjarfélagið Nuuk hefur gert.

Hin nýja bygging mun rísa við aðalgötuna í Nuuk, við hlið Hótels Hans Egede, en skammt frá eru einnig aðalverslunarmiðstöð bæjarins og skrifstofur landsstjórnar Grænlands.

Um er að ræða stærstu skólabyggingu landsins, samtals sextán þúsund fermetrar, og mun hún bæði þjóna sem leik- og grunnskóli. Jafnframt verður byggingin íþrótta- og menningarmiðstöð fyrir bæjarbúa á kvöldin og um helgar en íbúarnir fá aðgang að svokölluðu hjartarými byggingarinnar og íþróttasal. Verður þetta því bygging sem mun þjóna mun öllum bæjarbúum, jafnt ungum sem öldnum.

Ístak Fréttir

Vinna við Fossvogsbrú hafin

Sjálfbærniskýrsla Ístaks

Skrifað undir samning við NLSH

Ístak hélt BIM dag Ístaks í annað sinn

Nýtt hjúkrunarheimili í Boðaþingi vígt

LiuGong - 100% rafdrifin vinnuvél til Ístaks

Jólakveðja frá Ístak

Samningur við Veitur

Ístak fagnar 55 ára afmæli

Fossvogsbrú

Verksamningur undirritaður um smíði Fossvogsbrúar

Fyrirmyndarfyrirtæki árið 2025

Samkomulag náð eftir langa bið

Samkomulag náð eftir langa bið

Nýtt hjúkrunarheimili í Boðaþingi vígt

Framkvæmdir við fjölnota íþróttahús í Borgarbyggð í góðum farvegi

Ístak byggir upp innviði fyrir fyrsta vindorkuver Íslands

Umfangsmikil og fjölbreytt verkefni framundan

Framkvæmdatími og verklok

Stolt af þátttöku í orkuskiptum Íslands

Ístak leggur sitt af mörkum til styrktar Píeta-samtökunum

#TeamVarnargarðar - Sameinast um stuðning við UMFG

Fyrsta flugvélin afgreidd í nýjum landgöngubrúm í Keflavík

Nýtt svið - Innri þjónusta

Jólakveðjur frá Ístak

Fyrsta skóflustungan - Safamýri

100 ára starfsafmæli fagnað

Nýr hornsteinn lagður í Sögu

Skrif­að undir verk­samn­ing vegna göngu- og hjóla­brúar yfir Sæbraut

Fréttir af Hótel Sögu

Grillið á Hótel Sögu

Klæðningin á nýja skólanum í Nuuk er tilbúin.

Skemmdir á hitaveitulögn- Suðurnes

115 tonna jarðýta til starfa við varnagarðana

Endurmeta vinnu við varnargarða

Landið mikið sprungið og kvika ligg­ur grunnt

Einn og hálf­ur metri hrauns yfir mik­il­væg­an brunn

Eldgos í Grindavík

Jólakveðja frá Ístak

Gamli hornsteinninn á Sögu fannst í dag

Byggt yfir Hótel Sögu

Nýr töskusalur á Keflavíkurflugvelli

Ný akbraut (MIKE) tekin í notkun á Keflavíkurflugvelli

Formleg opnun nýrrar tvíbreiðrar brúar yfir Stóru-Laxá

Skeiða- og Hrunamannavegur (30) um Stóru-Laxá

Tafir vegna kuldatíðar og afhendingu búnaðar

Brúnni forðað frá stórtjóni

Opnað fyrir umferð á brú yfir Stóru Laxá

Fyrsta skóflustungan af Steingerði

Fyrsta sporlausa jarðvarmavirkjun heims

Framkvæmdaverk Ístaks

Utanríkisráðherra heimsækir Nuuk

Fréttir af hringvegi um Hornarfjarðarfljót

Páll Sigurjónsson stofnandi og fv. framkvæmdastjóri Ístaks látinn

Framkvæmdir við hringveginn um Kjalarnes á tíma

Vígsla stúdentagarða FS á Sögu

Hjálmur með erindi á Brúarráðstefnu Vegagerðarinnar

Edda - Hús íslenskra fræða

Viðvörun

Nýr þjónustusamningur við MachineMax

Nýtt verk hjá IKEA

BIM Dagur Ístaks

Ístak er Fyrirmyndarfyrirtæki í rekstri árið 2022!

Ístak skrifar undir tvo nýja verksamninga við Félagsstofnun Stúdenta

Við erum framúrskarandi fyrirtæki...aftur!

Verk á Keflavíkurflugvelli

Kolefnisföngun á Hellisheiði

Hús Íslenskra Fræða – allt á réttri leið

Brú á Stóru-Laxá

Ístak skrifar undir samning um byggingu á hjúkrunarheimili við Boðaþing

Undirritun samnings við Miðbæjareigna og Kjalar Fjárfestingarfélags

Undirritun samninga við Félagsstofnun stúdenta vegna Hótel Sögu

Forvarnarverðlaun VÍS 2022

Gjafaleikur - Verk og vit 2022

Verk og vit 2022

Ný vefsíða Ístaks

Nýr samningur um frekari uppbyggingu Isavia í Keflavík

Við erum framúrskarandi fyrirtæki

Góður gangur í Bryggjuhverfinu

Skrifað undir verksamning vegna göngu- og hjólabrúar yfir Sæbraut

Landið mikið sprungið og kvika liggur grunnt

Einn og hálfur metri hrauns yfir mikilvægan brunn