Föstudaginn 2. október náðist stór áfangi hjá Ístaki í Vaðölduveri, vindorkuveri Landsvirkjunar, þegar 28. og jafnframt síðasta vindmylluundirstaðan var steypt. Fyrsta undirstaðan var steypt 15. september 2025 og hefur því tekið rétt rúmt ár að steypa þær allar. Það er frábær árangur, ekki síst þegar litið er til krefjandi aðstæðna á hálendinu. Gerð hverrar undirstöðu er mikið nákvæmnisverk. Í hverri þeirra eru 80–90 tonn af bendistáli og um 450 rúmmetrar af steypu, sem samsvarar 50-60 steypubílsförmum sem dælt er í mótin í einni samfelldri lotu. Á þessu rúma ári hafa alls verið notaðir um 13.000 rúmmetrar af steypu og 2.300 tonn af bendistáli í verkinu. Til að setja það í samhengi samsvarar steypumagnið um 1.600 steypubílsförmum og nægir til að steypa um 100 einbýlishús. Nú er kapp lagt á að ljúka frágangi jarðvinnu áður en veturinn skellur á. Verkið er vel á undan áætlun, en áætlaður verktími er til september 2027. Í tilefni áfangans var slegið upp veislu í mötuneytinu í Vaðölduveri þar sem boðið var upp á glæsilega köku frá Almari bakara í Hveragerði. Kakan var nokkuð nákvæm eftirlíking af undirstöðu í mælikvarðanum 1:20. Þetta verkefni er frábær viðbót við langa og farsæla sögu Ístaks í uppbyggingu orkumannvirkja á Íslandi

Ístak semur við First Water um framkvæmdir við lok uppbyggingar á fyrsta áfanga landeldisstöðvar í Þorlákshöfn Ístak hefur undirritað samning við First Water um umfangsmiklar framkvæmdir á athafnasvæði fyrirtækisins í Þorlákshöfn. Verkefnið er liður í því að ljúka fyrsta áfanga landeldisverkefnis First Water, en með framkvæmdunum tvöfaldast árleg framleiðslugeta stöðvarinnar, úr 5.000 í 10.000 tonn. Verkefnið sem Ístak tekur að sér felur í sér uppbyggingu kerja- og stjórnbyggingar sem mun hýsa átta eldisker, hvert um 5.500 rúmmetra að stærð, ásamt tilheyrandi tæknibúnaði. Umfang verksins Samningurinn nær yfir jarðvinnu, lagnir, uppsteypu, stálvirki og utanhúsfrágang. Framkvæmdir hefjast á næstunni og er gert ráð fyrir að þær taki 16–18 mánuði, með áætluðum verklokum á fyrsta ársfjórðungi 2028. „ Uppbygging First Water er metnaðarfullt og tæknilega krefjandi verkefni sem fellur vel að reynslu og þekkingu Ístaks. Við erum stolt af því að taka þátt í þessum mikilvæga áfanga og hlökkum til góðs samstarfs við First Water við framkvæmdina, “ segir Karl Andreassen, forstjóri Ístak. „ Samningurinn við Ístak er stór og mikilvægur áfangi í uppbyggingu First Water. Með framkvæmdunum ljúkum við fyrsta áfanga verkefnisins og tvöföldum núverandi framleiðslugetu. Það er ánægjulegt að fá öflugt íslenskt verktakafyrirtæki með mikla reynslu af flóknum framkvæmdum til samstarfs við okkur, “ segir Einar Örn Ólafsson, forstjóri First Water. Um er að ræða fyrsta áfanga af sex í landeldisstöð First Water í Þorlákshöfn.

Fyrsti skóladagurinn er alltaf sérstakur en í Nuuk, Grænlandi var góð ástæða til að fagna þetta árið. Skólabörnin I Nuuk gátu loks stigið inn í glænýjan og langþráðan skóla sinn – Atuarfik Inussuk. Ístak hefur verið alverktaki við byggingu skólans, en um er að ræða risavaxið samfélagsverkefni í miðbæ Nuuk. Skólinn mun þjóna um 1.200 börnum auk þess er sérbygging fyrir leikskóla fyrir 120 börn. Heildarstærð byggingarinnar er um 18.000 fermetrar en Ístak sá einnig um frágang á allri skólalóð og bílastæðum. Framkvæmdin var gríðarlega efnismikil og fóru til dæmis rúmlega 5.700 rúmmetrar af steypu, 24.000 fermetrar af mótum og 518 tonn af járnbendingu í verkið. Kennileiti í landslaginu Nafnið Inussuk þýðir „varða“ á grænlensku – manngerðu grjóthrúgurnar sem í gegnum kynslóðir hafa þjónað sem kennileiti í landslaginu. Nafnið var valið af íbúum Nuuk og passar á margan hátt fallega við metnað nýja skólans: Að verða áfangi fyrir Nuuk og leiðarljós fyrir nemendurna á þeirra menntabraut. Við hjá Ístaki óskum Nuuk og öllum nemendum skólans innilega til hamingju með þessa glæsilegu nýju byggingu.

Nýlega bættist rafdrifinn Mercedes-Benz eActros 600 við tækjaflota Ístaks. Um er að ræða þriggja öxla 6x2 dráttarbíl sem verður nýttur í fjölbreyttum verkefnum fyrirtækisins og markar mikilvægt skref í áframhaldandi orkuskiptum Ístaks. Með tilkomu bílsins getur Ístak fært rafvæðinguna inn á nýtt svið starfseminnar og dregið úr notkun jarðefnaeldsneytis í þungaflutningum. Ístak hefur á undanförnum árum lagt aukna áherslu á að nýta innlenda, endurnýjanlega orku þar sem því verður við komið. Í Stapafellsnámu hefur stór hluti efnisvinnslunnar þegar verið rafvæddur, með tilheyrandi samdrætti í notkun jarðefnaeldsneytis. Nýi dráttarbíllinn er eðlilegt framhald þeirrar vegferðar og færir orkuskiptin úr staðbundinni efnisvinnslu yfir í flutninga. Ávinningurinn felst því ekki eingöngu í einum nýjum bíl í flotanum. Með fjárfestingunni byggir Ístak upp þekkingu og reynslu sem nýtist við frekari endurnýjun tækjaflotans, dregur úr losun í eigin starfsemi og eykur möguleika fyrirtækisins á að sinna verkefnum með hagkvæmari og umhverfisvænni hætti. eActros 600 er búinn 621 kWh LFP-rafhlöðum og er hannaður fyrir krefjandi þungaflutninga. Það verður því áhugavert að sjá hvernig bíllinn reynist í daglegum rekstri Ístaks og hvaða tækifæri reynslan af honum skapar fyrir næstu skref í orkuskiptum fyrirtækisins. Verkefnið er styrkt af Loftlags- og orkusjóði.

Nýtt hjúkrunarheimili var vígt við Skjólgarð á Höfn í Hornafirði föstudaginn 14. ágúst 2026. Nýbyggingin sem nú hefur verið tekin í notkun er fyrri áfangi verksins þar sem tekin hafa verið í notkun 20 sjúkrarými. Verkefnið fól í sér bæði viðbyggingu við Skjólgarð og umfangsmiklar endurbætur á eldra húsnæði heimilisins þar sem gert var ráð fyrir 10 sjúkrarýmum til viðbótar. Ístak kom að verkinu sem stýriverktaki í lok síðasta árs eftir að verkkaupi hafði rift verksamningi við þáverandi aðalverktaka.

Nýtt fjölnota íþróttahús í Borgarnesi hefur nú náð mikilvægum áfanga. Þann 10. ágúst fór fram öryggisúttekt á nýja húsinu sem gekk afar vel og voru engar athugasemdir skráðar. Virkilega ánægjulegt. Borgarbyggð hefur í kjölfarið tekið húsið formlega í notkun. Mannvirkið mun strax byrja að þjóna nærsamfélaginu, en um næstu helgi mun fara þar fram glæsilegt frjálsíþróttamót í húsinu. Við hjá Ístaki þökkum Borgarbyggð fyrir frábært samstarf og óskum íbúum til hamingju með nýja aðstöðu.

Öryggisdagur Ístaks var haldinn þann 29. maí sl. Markmið dagsins er að minna á mikilvægi skipulegs vinnuverndarstarfs með því að brjóta upp hefðbundna dagskrá og gera eitthvað eftirminnilegt saman, með öryggi og vinnuvernd í forgrunni. Í tilefni dagsins var boðið upp á fræðslu, samtöl og æfingar á vinnustöðum Ístaks vítt og breitt um landið sem og á Grænlandi. Þemað í ár var Viðbragðsgeta vegna óvæntra atburða, þar sem lögð var áhersla á að rýna viðbragðsáætlanir á hverjum stað ásamt því að æfa viðbragð við hinum ýmsu ógnum í umhverfinu. Í starfsemi Ístaks eru fjölmörg atriði sem þarf að huga að, til dæmis bruni í byggingum, bruni í vélum og tækjum, eldsumbrot og vatnsflóð svo eitthvað sé nefnt. Á mörgum stöðum var skipulögð fræðsla um eldvarnir og viðbrögð við bruna þar sem bæði starfsfólk Ístaks og undirverktaka okkar fengu að spreyta sig á notkun slökkvitækja og annars slökkvibúnaðar. Til að kanna viðbragðsgetu voru haldnar rýmingaræfingar þar sem skrifstofuhúsnæði, vinnubúðir og heilu vinnusvæðin voru rýmd. Þess ber að geta að sum vinnusvæðin okkar spanna tugi kílómetra en með góðu skipulagi og upplýsingaflæði tókst að rýma þau hratt og vel. Dagurinn heppnaðist vel og við höfum bætt við okkur bæði nýrri þekkingu og reynslu sem getir okkur enn betur í stakk búin til að takast á við óvænta atburði. Öryggisdagurinn bauð ekki síður upp á tækifæri til að rýna enn betur á hverjum stað og hvaða áskoranir eru fyrir hendi í vinnuumhverfinu og mikil umræða var um fyrri atvik og hvernig megi fyrirbyggja sambærileg atvik í framtíðinni. Við viljum þakka sérstaklega þeim sem komu að verkefninu með okkur, bæði leiðbeinendum og þeim slökkviliðum sem komu að fræðslunni og gerðu daginn enn eftirminnilegri.